పట్టుబడ్డ 5.22 కోట్లు నాదే.. ఎమ్మెల్యే స్టిక్కర్ మాత్రం డ్రైవర్‌ది: ఒంగోలు నగల వ్యాపారి

తమిళనాడు సరిహద్దులో పోలీసులకు పట్టుబడిన రూ.5.20 కోట్ల నగదు తనదేనని ప్రకటించుకున్న ఒంగోలు బంగారం వ్యాపారి నల్లమల్లి బాలు మరిన్ని వివరాలు వెల్లడించారు. నగదు పట్టుబడిన కారుపై ఎమ్మెల్యే స్టిక్కర్‌ను తన డ్రైవరే అతికించినట్లు ఆయన చెప్పారు. గిద్దలూరు ఎమ్మెల్యే అన్నా రాంబాబు పేరుతో ఉన్న ఆ స్టిక్కర్‌కు గడువు ముగిసిందని పేర్కొన్నారు. డ్రైవర్‌ దాన్ని ఎక్కడ సంపాదించాడో తనకు తెలియదని బాలు చెప్పుకొచ్చాడు. కారులో పట్టుబడిన నగదు తనదేనన్న ఆయన.. శ్రావణ మాసం సందర్భంగా బంగారం కొనేందుకు చెన్నై తీసుకువెళ్తున్నట్లు వివరించారు.

ప్రతిపక్ష నేతలు విమర్శిస్తున్నట్లు మంత్రి బాలినేనికి ఈ నగదుతో ఎలాంటి సంబంధం లేదని వివరించారు. నల్లమల్లి బాలు మంత్రి బాలినేని శ్రీనివాస్‌రెడ్డికి సన్నిహితుడు కావడం, కార్పొరేటర్‌ అభ్యర్థిగా బరిలో నిలవడంతో ఈ వ్యవహారంపై రాజకీయ దుమారం రేగింది. తమిళనాడు పోలీసుల తనిఖీల్లో రూ.5.22 కోట్ల నగదు స్వాధీనం చేసుకోగా.. పట్టుబడ్డ వాహనంపై గిద్దలూరు ఎమ్మెల్యే స్టిక్కర్ ఉండటంతో ఆ నగదు వైఎస్ఆర్‌సీపీ నేతలదేనంటూ ప్రచారం జరిగింది. దీనిపై సోషల్ మీడియా వేదికగా అనేక ఆరోపణలు వెల్లువెత్తాయి.

అయితే పట్టుబడ్డ ఆ నగదుతో తనకెలాంటి సంబంధం లేదంటూ గిద్దలూరు వైసీపీ ఎమ్మెల్యే అన్నా రాంబాబు తోసిపుచ్చారు. ఇదే సమయంలో ఆ వాహనం ఏపీ మంత్రి బాలినేని శ్రీనివాస్‌రెడ్డిది అని ప్రచారం జరిగింది. ఆ వాహనానికి ఎలాంటి అనుమతి లేకుండా ముగ్గురు వ్యక్తులు సరిహద్దు దగ్గర రాష్ట్రంలోకి రావడంతో.. తమిళనాడు పోలీసులు తనిఖీ చేశారు. అరంబాక్కం సమీపంలోని ఎలాపూర్‌ చెక్ పోస్ట్ వద్ద పోలీసులు తనిఖీలు నిర్వ‌హించ‌గా నగదు, భారీగా బంగారం గుర్తించారు.