ఏపీ: ఆడపిల్ల పుడితే అకౌంట్‌లో డబ్బులు జమ.. పథకం పూర్తి వివరాలివే

కేంద్రం మిషన్‌ శక్తి కింద కొత్త పథకానికి శ్రీకారం చుట్టిన సంగతి తెలిసిందే. మహిళలు రెండోసారి గర్భం దాల్చినప్పుడు ఆడపిల్ల పుడితే అర్హులైన వారికి రూ.ఆరు వేలు ఆర్థిక సాయంగా అందజేస్తోంది. ప్రధానమంత్రి మాతృత్వ వందన యోజన (పీఎంవీవై) కింద తొలి కాన్పులో ఆడ లేదా మగ బిడ్డ పుడితే మూడు దశల్లో రూ.5వేలు చెల్లిస్తోంది. ఈ పథకానికయ్యే వ్యయంలో కేంద్ర, రాష్ట్ర ప్రభుత్వాలు 60:40 నిష్పత్తిలో నిధులు కేటాయిస్తారు. ఈ పథకంలో రెండో కాన్పునకు ఆర్థిక లబ్ధి వర్తించేది కాదు.. ఇప్పుడు దానిని సవరిస్తూ.. రెండో కాన్పులో అమ్మాయి పుడితే మాత్రమే తల్లికి రూ.6వేలు ఇచ్చేలా మార్పుచేశారు. రెండో ప్రసవంలో కవలలు జన్మించి, వారిలో ఒక అమ్మాయి ఉన్నా పథకం వర్తిస్తుంది. ఈ పథకం కింద మొదటిసారి మహిళ గర్భం దాల్చినట్లు ఆన్‌లైన్‌లో నమోదుకాగానే రూ.1,000 ఇస్తారు. అలాగే ఆరు నెలల తర్వాత రూ.2 వేలు.. ప్రసవం జరిగిన 14 వారాల్లో ఇమ్యూనైజేషన్‌ సైకిల్‌ పూర్తయ్యాక రూ.2,000 చొప్పున అందజేస్తారు.

ప్రధానమంత్రి మాతృత్వ వందన యోజన పథకం కింద గర్భవతులైన మహిళలు సద్వినియోగంచేసుకోవాలని ఏపీ ప్రభుత్వ అధికారులు తెలిపారు. గర్భవతులైన మహిళలు ఆధార్ కార్డు, బ్యాంకు ఖాతా, నకళ్ళతో 12 వారాల లోపు తమ పేర్లను ఆస్పత్రుల్లో నమోదు చేసుకుంటే విడతలవారీగా వారి ఖాతాల్లో రూ.ఐదు వేలు జమ అవుతాయి అని చెప్పారు.
అర్హులైన వారికి జనన ధ్రువీకరణ పత్రం ఆధారంగా డబ్బులు చెల్లిస్తారు. తొలిసారి గర్భం దాల్చినప్పుడు మూడు దశల్లో అందించే రూ.5వేల ఆర్థిక సహాయం పంపిణీలోనూ మార్పులు చేయనున్నారు. గర్భం దాల్చినప్పుడు రూ.3,000, ప్రసవం జరిగిన 14 వారాలకు రూ.2,000 చొప్పున రెండు విడతల్లోనే ఇస్తారు. అర్హులైన వారు ఈ స్కీమ్‌లో చేరాలంటే ఆన్‌లైన్‌లో రిజిస్ట్రేషన్ చేసుకోవచ్చు.

అర్హులు https://pmmvycas.nic.in/public/beneficiaryuseraccount/login లింక్ ద్వారా నేరుగా స్కీమ్ వెబ్‌సైట్‌లోకి వెళ్లొచ్చు. అక్కడ బెనిఫీషియరీ రిజిస్టర్ చేసుకొని లాగిన్ అవ్వాలి. పథకం కింద ప్రయోజనం పొందాలని భావిస్తే.. ఎల్ఎంపీ డేట్ కచ్చితంగా కావాల్సి ఉంటుంది. ఎంసీపీ కార్డు కావాల్సి ఉంటుంది.. వీటిని ఆశ వర్కర్ దగ్గర అడిగి తీసుకోవాల్సి ఉంటుంది. కేంద్ర, రాష్ట్ర ప్రభుత్వ ఉద్యోగాలు చేసే వారికి మాత్రం ఈ స్కీమ్ వర్తించదు. ఏపీలో కూడా అర్హులైనవారు ఈ పథకానికి దరఖాస్తు చేసుకుంటే.. డబ్బులు నేరుగా వారి, వారి అకౌంట్‌లలో జమ అవుతాయి.

• Read Latest Andhra Pradesh News and Telugu News