వలంటీర్‌లో రెండో పెళ్లికి సిద్ధమైన సెక్రటరీ.. అడ్డొచ్చిన అన్నను కత్తితో పొడిచి..

గుంటూరు జిల్లా దాచేపల్లిలో పంచాయతీ సెక్రటరీ జాన్‌ పీరా నిర్వాకం బట్టబయలైంది. కట్టుకున్న భార్య ఉండగానే.. మహిళా గ్రామ వలంటీర్‌తో రెండో పెళ్లికి సిద్ధమయ్యాడు. మాయమాటలు చెప్పి వలంటీర్‌ను బుట్టలో వేసుకున్నాడు. తర్వాత రెండో పెళ్లికి సిద్ధమవ్వడంతో వలంటీర్ సోదరుడు అశోక్.. గ్రామ సెక్రటరీని నిలదీశాడు. ప్రశ్నించిన పాపానికి అశోక్‌పై సెక్రటరీ సోదరుడు కత్తితో దాడికి తెగబడ్డాడు. దీంతో బాధితుడు పోలీసులను ఆశ్రయించాడు.

పంచాయతీ సెక్రటరీ జాన్‌ పీరాకు ఇప్పటికే పెళ్లయి ఇద్దరు పిల్లలు కూడా ఉన్నారు. అయినా మహిళా వలంటీర్‌తో రెండో పెళ్లికి రెడీ అయ్యాడు. గతంలో సైతం గ్రామ సెక్రటరీ జాన్ పీరాపై పలు లైంగిక వేధింపుల ఆరోపణలు ఉన్నాయి. జాన్‌ పీరా లైంగిక వాంఛకు పలువురు మహిళలు బలైనట్లు తెలుస్తోంది.

ఆయా పనుల నిమిత్తం వచ్చే మహిళలను మాయమాటలు చెప్పి లోబర్చుకున్నట్లు ఆరోపణలు వినిపిస్తున్నాయి. అలాగే రాజకీయంగా కూడా జాన్‌ పీరా యాక్టివ్‌గా కొనసాగుతున్నట్లు సమాచారం. గ్రామ సెక్రటరీ నిర్వాహకంపై గ్రామస్తులు మండిపడుతున్నారు. జాన్‌ హీరాపై కఠిన చర్యలు తీసుకోవాలని డిమాండ్ చేస్తున్నారు.