విజయవాడలో ఆ ప్రాంత ప్రజలకు అధికారుల హెచ్చరిక

తెలుగు రాష్ట్రాల్లో గత కొన్ని రోజులుగా భారీ వర్షాలు కురుస్తున్నాయి. దీంతో ప్రాజెక్టులకు భారీగా వరద నీరు పోటెత్తుతోంది. కృష్ణా బ్యారేజీకి వరద ప్రవాహం భారీగా పెరుగుతోంది. ఈ సందర్భంగా విజయవాడలో పలు ప్రాంతాల ప్రజల్ని అప్రమత్తంగా ఉండాలన్నారు నగర కమిషనర్ ప్రసన్న వెంకటేష్‌. కృష్ణా పరివాహక ప్రాంత ప్రజలు అప్రమత్తంగా ఉండాలని ఆయన సూచించారు. దివినగర్, భూపేష్ గుప్తా నగర్, తారకరామనగర్, భవానీపురం, విద్యాధరపురం ప్రాంతాల ప్రజలు పునరావాస కేంద్రాలకు వెళ్లాలని ఆయన కోరారు. కార్పొరేషన్ హెల్ప్‌లైన్‌ నెంబర్లు కూడా ఏర్పాటు చేశారు. ఎవరైనా సాయం కోసం 0866-2424172, 2422515కు ఫోన్ చేయాలని వెంకటేశ్ తెలిపారు.

మరోవైపు ఇప్పటికే నదులు, చెరువులు వరద నీరుతో పొంగి పొర్లుతున్నాయి. ప్రాజెక్టులకు కూడా భారీగా వరద నీరు రావడంతో అధికారులు గేట్లు ఎత్తి దిగువ ప్రాంతాలకు నీటిని విడుదల చేస్తున్నారు. అయితే వర్షాలు మరో రెండు రోజుల పాటు కురిసే అవకాశం ఉన్నట్లు వాతావరణ శాఖ అధికారులు చెబుతున్నారు. బంగాళాఖాతంలో ఏర్పడిన అల్పపీడనం కొనసాగుతోంది. తూర్పు మధ్యప్రదేశ్‌ మధ్య భాగం, దాని పరిసర ప్రాంతాల్లో ఏర్పడిన అల్పపీడనానికి అనుబంధంగా 7.6 కిలోమీటర్లు ఎత్తు వరకు ఉపరితల ఆవర్తనం కూడా కొనసాగుతోందని వాతావరణ అధికారులు తెలిపారు.
Read More: ఎన్నారై ఆస్పత్రికి అచ్చెన్నాయుడు తరలింపు.. వీల్ చైర్‌లోనే, కదల్లేని పరిస్థితి!
ఇవాళ మరో అల్పపీడనం ఏర్పడే అవకాశం ఉన్నట్లు అధికారులు తెలిపారు. రానున్న 48 గంటల్లో ఆంధ్రప్రదేశ్ రాష్ట్రంలో పలుచోట్ల భారీ వర్షాలు కురిసే అవకాశం ఉందన్నారు. . ఉత్తర కోస్తాంధ్ర, దక్షిణ కోస్తాంధ్ర, రాయలసీమల్లో ఉరుములు, మెరుపులతో పాటు తేలికపాటి నుంచి ఒక మోస్తరు వర్షాలు కురిసే అవకాశం ఉందంది. కొన్నిచోట్ల భారీ వర్షాలు కురిసే అవకాశం ఉందని కూడా వాతావరణ శాఖ అధికారులు తెలిపారు. కోస్తా తీరం వెంబడి బలమైన గాలులు వీస్తాయన్నారు. మత్స్యకారులు ఎవరూ సముద్రంలోకి వేటకు వెళ్లకూడదని హెచ్చరించారు.