ఏపీకి వాయు‘గండం’.. కోస్తాలో భారీ వర్షాలు.. తెలంగాణ, రాయలసీమల్లోనూ వర్షాలు

బంగాళఖాతంలో ఏర్పడిన అల్పపీడనం ప్రభావంతో కోస్తాంధ్రలో వర్షాలు కురుస్తున్నాయి. ఉత్తరాంధ్ర జిల్లాల్లో బుధవారం ఉదయం నుంచి భారీ వర్షం కురుస్తోంది. నైరుతి బంగాళఖాతంలో ఏర్పడిన అల్పపీడనం 24 గంటల్లో వాయుగుండంగా మారనుందని విశాఖపట్నంలోని వాతావరణ కేంద్రం తెలిపింది. దీని ప్రభావంతో వచ్చే రెండు రోజుల పాటు రాష్ట్రవ్యాప్తంగా విస్తారంగా వర్షాలు కురుస్తాయని ప్రకటించింది. ఉత్తరాంధ్ర, గోదావరి జిల్లాల్లో భారీ వర్షాలు కురుస్తాయని వాతావరణ శాఖ తెలిపింది.

తీవ్ర అల్పపీడన ప్రభావంతో.. తీరం వెంబడి 45 నుంచి 50 కి.మీ. వేగంతో గాలులు వీస్తున్నాయి. మత్స్యకారులు వేటకు వెళ్లొద్దని వాతావరణ శాఖ అధికారులు హెచ్చరించారు. రాష్ట్రంలోని కొన్ని చోట్ల అతిభారీ వర్షాలు కురిసే అవకాశం ఉందని హెచ్చరించారు.
వాయుగుండానికి ఉపరితల ఆవర్తనం తోడు కావడంతో.. కోస్తాంధ్రతోపాటు తెలంగాణ, రాయసీమల్లోనూ వర్షాలు కురిసే అవకాశం ఉంది. రాయలసీమ జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని వాతావరణ శాఖ తెలిపింది.

హైదరాబాద్ సహా తెలంగాణలోని పలు ప్రాంతాల్లో వర్షాలు కురుస్తున్నాయి. ఎగువన కర్ణాటకలో భారీ వర్షాలు కురుస్తున్నాయి. ఉత్తర కర్ణాటక, దక్షిణ కర్ణాటకతోపాటు తమిళనాడులోనూ వర్షాలు భారీగా కురుస్తున్నాయి. ఎగువన కురుస్తోన్న వర్షాల కారణంగా కృష్ణా నదిలోకి వరద ప్రవాహం పెరుగుతోంది. దీంతో నాగార్జున సాగర్ గేట్లను ఎత్తి నీటిని దిగువకు విడుదల చేస్తున్నారు.