అల్పపీడనం, ఆవర్తనం ఎఫెక్ట్.. ఏపీకి భారీ వర్ష సూచన

అల్పపీడన ప్రభావంతో ఏపీలో వర్షాలు పడే సూచనలు ఉన్నాయంటోంది విపత్తుల నిర్వహణ శాఖ. దక్షిణ కోస్తా మీదుగా ఈ నెల 23న అల్పపీడనం ఏర్పడే అవకాశం ఉంది.. అలాగే ఉత్తరాంధ్ర మీదుగా ఉపరితల ఆవర్తనం కొనసాగుతోంది. వీటికి తోడు తూర్పు మధ్య అరేబియా సముద్రంలో అల్పపీడనం నడు్స్తోంది. వీటి ప్రభావంతో ఏపీలో వానలు కురిసే అవకాశం ఉంది. తెలంగాణలో అక్కడక్కడా ఓ మోస్తరు వానలకు అవకాశం ఉందని అంచనా వేస్తున్నారు.

మంగళ, బుధవారాల్లో రాష్ట్రంలో విస్తారంగా వర్షాలు పడే అవకాశం ఉందని విపత్తుల నిర్వహణశాఖ తెలిపింది. తూర్పు గోదావరి, కృష్ణా, గుంటూరు, కర్నూలు, కడప జిల్లాల్లో ఒక మోస్తరు నుంచి భారీ వర్షాలకు ఛాన్స్ ఉంది. ప్రకాశం, నెల్లూరు, చిత్తూరు జిల్లాల్లో కూడా వర్షాలు పడే అవకాశం ఉంది. శ్రీకాకుళం, విజయనగరం, విశాఖ, అనంతపురం జిల్లాల్లో పలు చోట్ల తేలికపాటి నుంచి ఒక మోస్తరు వానలు కురుస్తాయంటున్నారు.

కొన్ని జిల్లాలో భారీ వర్షాలకు కురిసే అవకాశం ఉండటంతో..ప్రభావిత జిల్లాల అధికారుల్ని విపత్తుశాఖ అప్రమత్తం చేసింది. తీరం వెంబడి ఈదురుగాలులు వీస్తాయని అంచనాతో..మత్స్యకారులు వేటకు వెళ్లరాదని, లోతట్టు ప్రాంతాల ప్రజలు అలర్ట్‌గా ఉండాలని హెచ్చరిస్తున్నారు. తగిన జాగ్రత్తలు తీసుకోవాలని విపత్తుల నిర్వహణశాఖ చెబుతోంది. ఇటు తెలంగాణలోకి కొన్ని జిల్లాల్లో ఓ మోస్తరు వర్షాలు పడే అవకాశం ఉందని అధికారులు చెబుతున్నారు.