ఏపీలో మరో రెండ్రోజులు విస్తారంగా వర్షాలు

ఏపీలో వర్షాలు కురుస్తున్నాయి. దక్షిణ భారత ద్వీపకల్ప ప్రాంతంపై ఉపరితల ఆవర్తన ద్రోణి ప్రభావం చురుగ్గా ఉంది. ఆంధ్రప్రదేశ్‌పై గాలి విలోమ ప్రభావం తక్కువ స్థాయిలో ఉంటుందని విశాఖ వాతావరణ కేంద్రం అధికారులు చెప్పారు. ఈ ప్రభావంతో రానున్న 48 గంటల్లో రాష్ట్రంలో పలు ప్రాంతాల్లో విస్తారంగా వర్షాలు కురిసే అవకాశం ఉందని అంచనా వేస్తున్నారు. మంగళ, బుధవారాల్లో కొన్ని ప్రాంతాల్లో ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురుస్తాయంటున్నారు.

ఏపీలోని ఉత్తర, దక్షిణ కోస్తాంధ్రలతోపాటు రాయలసీమ ప్రాంతాల్లో కొన్నిచోట్ల విస్తారంగా వర్షాలు కురిసే అవకాశం ఉంది. ఉంగడచిన 24 గంటల్లో రాష్ట్ర వ్యాప్తంగా విస్తారంగా వర్షాలు కురిశాయి. గుంటూరు, కృష్ణా, ప్రకాశం, తూర్పు, పశ్చిమ గోదావరి జిల్లాల్లోని పలుచోట్ల భారీ వానలు పడ్డాయి. ఈ వర్షాలకు వాగులు, వంకలు పొంగిపొర్లుతున్నాయి. ఉభయ గోదావరి జిల్లాల్లో లంకల గ్రామాల పరిస్థితులు మారిపోయాయి. కొన్ని గ్రామాలకు రాకపోకలు ఆగిపోయాయి. ఎగువును కురుస్తున్న వానలకు గోదావరి కూడా వరద పెరిగింది.