Andhra లో విగ్రహాల ధ్వంసం వెనుక పెద్ద కుట్ర.. హీరో సుమన్ సంచలనం

ఆంధ్రప్రదేశ్‌లో తీవ్ర కలకలం రేపుతున్న హిందూ దేవుళ్ల విగ్రహాల ధ్వంసం ఘటనలపై ప్రముఖ సినీ నటుడు సుమన్ సంచలన వ్యాఖ్యలు చేశారు. ఆదివారం తిరుమలలో శ్రీవేంకటేశ్వర స్వామి వారిని దర్శించుకున్న అనంతరం హీరో సుమన్ మీడియాతో మాట్లాడుతూ.. ఏపీలో విగ్రహాల ధ్వంసం వెనుక పెద్ద కుట్ర ఉందని భావిస్తున్నట్లు వ్యాఖ్యానించారు. జగన్ ప్రభుత్వానికి చెడ్డ పేరు తెచ్చేందుకు ప్రతిపక్ష పార్టీలు ఇలాంటి కుట్రలు చేసి ఉండొచ్చని అనుమానం వ్యక్తం చేశారు. ఇతరులు కూడా ఈ ఘటనలకు పాల్పడి ఉండొచ్చన్నారు.

ఏది ఏమైనా దేవుడి విషయంలో తప్పు చేసిన వారికి కచ్చితంగా ఆ దేవుడే శిక్ష విధిస్తాడని సుమన్ అభిప్రాయపడ్డారు. ఆలయాలు, మసీదులు, చర్చిల భద్రతకు, పర్యవేక్షణకు సీసీ కెమెరాలను ఏర్పాటు చేయాలని ఏపీ ప్రభుత్వానికి సుమన్ సూచించారు. దేవాలయాలపై దాడులు, విగ్రహాల ధ్వంసానికి పాల్పడిన వారిని గుర్తించి కఠినంగా శిక్షించాలని ప్రధానమంత్రి నరేంద్రమోదీని కోరారు.

Super Deal: హైదరాబాద్ నుంచి ఆంధ్రాకు స్పెషల్ విమానాలు: కేవలం గంట జర్నీ.. సంక్రాంతి స్పెషల్!
అలాగే విగ్రహాలను ఎవరు ధ్వంసం చేశారో నిర్ధారణకు రాకుండా ప్రతిపక్షాలు ప్రభుత్వంపై నిందలు వేయడం తగదని సుమన్ అన్నారు. సీఎం జగన్‌కు చెడ్డపేరు తీసుకురావడానికి ప్రతిపక్ష నాయకులే ఆ విగ్రహాల ధ్వంసానికి పాల్పడి ఉంటారని ఆరోపించారు. నిందితులను గుర్తించకుండా ఒకరిమీద మరొకరు నిందలు వేయడం సరైన పద్ధతికాదన్నారు. అలాగే హిందువుల మనోభావాలను దృష్టి పెట్టుకుని సీఎం జగన్ దేవాలయాల పరిరక్షణకు ప్రత్యేక చర్యలు తీసుకోవాలని విజ్ఞప్తి చేశారు. దేవుడి విగ్రహాలను ధ్వంసం చేసిన వారు కచ్చితంగా శిక్ష అనుభవిస్తారని పేర్కొన్నారు.

ఇక, సినిమాల గురించి సుమన్ మాట్లాడుతూ.. ఇప్పుడిప్పుడే షూటింగ్స్ ప్రారంభం అవుతున్నాయన్నారు. థియేటర్లను పూర్తి స్థాయిలో తెరిచేందుకు ఇంకా మూడు నుంచి ఆరు నెలలు పట్టవచ్చని అభిప్రాయపడ్డారు. త్వరలోనే సినిమా పరిశ్రమకు మంచి రోజులు వస్తాయని ఆశిస్తున్నట్లు సుమన్ తెలిపారు.