పోలీస్ పహారాలో బెజవాడ.. ప్రకాశం బ్యారేజ్ క్లోజ్.!

రేపు ఏపీ క్యాబినెట్, అసెంబ్లీ సమావేశాలు జరగనుండడం.. అమరావతి జేఏసీ అసెంబ్లీ ముట్టడికి పిలుపునిచ్చిన నేపథ్యంలో విజయవాడలో పోలీసులు హై అలర్ట్ ప్రకటించారు. వేలాది మంది పోలీసులను మోహరించారు. అసెంబ్లీ ముట్టడి, జైల్ భరో కార్యక్రామలకు అనుమతులు లేవని, ఎవరూ ఆందోళనలో పాల్గొనవద్దని విజయవాడ సీపీ ద్వారకా తిరుమల రావు హెచ్చరించారు. చట్టసభలకు ఆటంకం కలిగించేందుకు ప్రయత్నించడం రాజ్యాంగ వ్యతిరేకమని.. అలాంటి ఘటనలకు పాల్పడితే కఠిన చర్యలు తీసుకుంటామని ఆయన హెచ్చరించారు.

అసెంబ్లీ ముట్టడి.. జైలు భరో కార్యక్రమాలు చేపట్టవద్దని సీపీ సూచించారు. ఇప్పటికే టీడీపీ నేతలు, అమరావతి జేఏసీ నేతలకు నోటీసులు ఇచ్చామన్నారు. రేపు ఉదయాన్నే ప్రకాశం బ్యారేజీని మూసివేయనున్నట్లు ఆయన తెలిపారు. అసెంబ్లీ, హైకోర్టుకు వెళ్లే వ్యక్తులను మాత్రమే అనుమతిస్తామని స్పష్టం చేశారు. అలాగే ధర్నా చౌక్, బందర్ రోడ్డు, బెంజ్ సర్కిల్, ప్రకాశం బ్యారేజ్, గుంటూరు వెళ్లే రోడ్ల వద్ద భారీ బందోబస్తు ఏర్పాటు చేయనున్నట్లు చెప్పారు.

Also Read: రేపు ఏపీ క్యాబినెట్ భేటీ.. మూడు రాజధానులపై కీలక ప్రకటన?

విజయవాడ నగరంలో 144 సెక్షన్ అమలుపై సీపీ క్లారిటీ ఇచ్చారు. నగరమంతటా 144 సెక్షన్ అమల్లో లేదని ఆయన తెలిపారు. బెంజ్ సర్కిల్, బందరు రోడ్డు, ధర్నా చౌక్, ప్రకాశం బ్యారేజీ, స్టేట్ గెస్ట్‌హౌస్, రాజ్‌భవన్ తదితర ప్రాంతాల్లో అమల్లో ఉంటుందని సీపీ ద్వారకా తిరుమల రావు తెలిపారు. అయితే పోలీస్ యాక్ట్ 30 అమల్లో ఉంటుందని.. అనుమతులు లేకుండా ఎలాంటి ధర్నాలు, ర్యాలీలు చేపట్టకూడదని హెచ్చరించారు. హైకోర్టు సూచనల మేరకే చర్యలు తీసుకుంటామని సీపీ తెలిపారు.

నగరంలో ట్రాఫిక్ ఆంక్షలు విధించినట్లు సీపీ తెలిపారు. భారీ వాహనాలు నగరంలోకి అనుమతించడం లేదని, విజయవాడకు దూరం నుంచే మళ్లించనున్నట్లు వెల్లడించారు. హైదరాబాద్ వైపు నుంచి వచ్చే వాహనాలను ఇబ్రహీంపట్నం నుంచి.. ఏలూరు, వైజాగ్ వైపు నుంచి వచ్చే భారీ వాహనాలను హనుమాన్ జంక్షన్ వద్ద దారి మళ్లిస్తామని చెప్పారు.

Read Also: వైసీపీ మహిళా ఎమ్మెల్యేకి ‘అమరావతి’ సెగ.. అర్ధాంతరంగా వెనక్కి..