ఏపీలో రికార్డ్ స్థాయి ఉష్ణోగ్రతలు.. ఈ జిల్లాల్లో ప్రజలు జాగ్రత్త, వాతావరణశాఖ హెచ్చరిక

Ap Weather Today: ఆంధ్రప్రదేశ్‌లో ఎండలు దంచికొడుతున్నాయి. నాలుగు రోజులుగా రికార్డు స్థాయిలో ఉష్ణోగ్రతలు నమోదవుతున్నాయి. ఎండలకు వేడిగాలులు, ఉక్కపోత తోడయ్యాయి. దీంతో జనాలు అల్లాడిపోతున్నారు.. ఇంట్లో నుంచి బయటకు అడుగు పెట్టాలంటే జనాలు వణికిపోతున్నారు. ఉదయం 8 గంటల నుంచే ఎండలు మొదలవుతున్నాయని.. సాయంత్రం 5 గంటల వరకు కొనసాగుతున్నాయి. బుధవారం 20 మండలాల్లో వడగాల్పులు ప్రభావం చూపనున్నట్లు విపత్తుల నిర్వహణ సంస్థ తెలిపింది. మిగిలిన చోట్ల కూడా ఎండ ప్రభావం చూపే అవకాశం ఉందన్నారు. మంగళవారం 40 మండలాల్లో తీవ్ర వడగాల్పులు , 148 మండలాల్లో వడగాల్పులు వీచాయి. ఇవాళ ఎన్టీఆర్, గుంటూరు, బాపట్ల, పల్నాడు, ప్రకాశం, నెల్లూరు, తిరుపతి జిల్లాల్లోని కొన్ని ప్రాంతాల్లో 44°C - 45°Cల వరకు ఉష్ణోగ్రతలు నమోదయ్యే అవకాశం ఉంది. శ్రీకాకుళం, విజయనగరం, పార్వతీపురంమన్యం, జిల్లాల్లోని కొన్ని ప్రాంతాల్లో 41°C - 43°Cల వరకు ఉష్ణోగ్రతలు నమోదయ్యే అవకాశం ఉంది. అల్లూరి సీతారామరాజు, కాకినాడ, తూర్పుగోదావరి, ఏలూరు,కృష్ణా, కర్నూలు, నంద్యాల, అనంతపురం, శ్రీ సత్యసాయి, వైఎస్ఆర్, అన్నమయ్య, చిత్తూరు జిల్లాల్లోని కొన్ని ప్రాంతాల్లో 41°C - 43°Cల వరకు ఉష్ణోగ్రతలు నమోదయ్యే అవకాశం ఉంది.

ఇంట్లో ఉన్నా ఉక్కపోత.. బయటకు రావాలంటే ఎండల దెబ్బకు భయపడాల్సి వస్తోంది. ముఖ్యంగా వృద్ధులు, చిన్న పిల్లలు ఇబ్బందిపడుతున్నారు. వడదెబ్బతో పలువురు ప్రాణాలు కోల్పోయారు. మంగళవారం రాష్ట్రంలోనే అత్యధికంగా తూర్పుగోదావరి జిల్లా ధవళేశ్వరంలో 46.8 డిగ్రీల ఉష్ణోగ్రత నమోదైంది. విశాఖపట్నం మినహా మిగిలిన కోస్తా జిల్లాల్లో గరిష్ఠ ఉష్ణోగ్రతలు 45 డిగ్రీలపైకి చేరాయి. నేడు కూడా రాష్ట్రంలో గరిష్ఠంగా 45 డిగ్రీల వరకు ఉష్ణోగ్రతలు నమోదు కావచ్చని చెబుతున్నారు. రాష్ట్రవ్యాప్తంగా రాత్రి ఉష్ణోగ్రతలు తగ్గడం లేదు.. గరిష్ఠ ఉష్ణోగ్రతలు 39 డిగ్రీలకుపైనే కొనసాగాయి. ఎండల దెబ్బకు పిట్టలు కూడా నెలరాలుతున్నాయి.
ఉష్ణోగ్రతలు భారీగా నమోదవుతుండటంతో తగిన జాగ్రత్తలు తీసుకోవాలని అధికారులు సూచిస్తున్నారు. బయటకు వచ్చే సమయంలో కొన్ని సూచనలు పాటించాలంటున్నారు. ప్రయాణాల్లో ఉన్నవాళ్లు తగిన జాగ్రత్తలు తీసుకోవాలని.. లేని పక్షంలో ఇబ్బందిపడతారంటున్నారు. అత్యవసరమైతే తప్ప ప్రయాణాలు కూడా వాయిదా వేసుకోవడం మంచిది అనే అభిప్రాయాలు వ్యక్తమవుతున్నాయి. అంతేకాదు ఈ ఎండల దెబ్బకు అక్కడక్కడా అగ్ని ప్రమాదాలు జరుగుతున్నాయి. అంతేకాదు ట్రాన్స్‌ఫార్మర్లలో కూడా మంటలు చెలరేగుతున్నాయి. వడదెబ్బకు జనాలు అల్లాడిపోతున్నారు.. కొబ్బరి బోండాలు, శీతల పానియాలకు డిమాండ్ పెరిగింది. ఏపీ మాత్రమే కాదు తెలంగాణలో కూడా దాదాపుగా ఇదే పరిస్థితి కనిపిస్తోంది. మొత్తం మీద ఎండలు జనాల్ని ఠారెత్తిస్తున్నాయి.

• Read Latest Andhra Pradesh News and Telugu News