తేనెటీగల దాడి.. మంత్రి అనిల్‌కు తప్పిన ముప్పు, ముగ్గురు ఎమ్మెల్యేలకు గాయాలు

ఏపీ మంత్రి అనిల్‌కుమార్ యాదవ్‌కు తృటిలో ప్రమాదం తప్పింది. కర్నూలు జిల్లాలో పర్యటిస్తున్న మంత్రి.. తేనెటీగల దాడి నుంచి సురక్షితంగా బయటపడ్డారు. మంత్రి అనిల్‌కుమార్ యాదవ్.. పాములపాడు మండలం బానకచర్ల హెడ్ రెగ్యులేటర్ పరిశీలించేందుకు స్థానిక ఎమ్మెల్యేలు, నేతలతో కలిసి వెళ్లారు. అనిల్ హెడ్ రెగ్యులేటర్‌ను పరిశీలిస్తున్న సమయంలో తేనెటీగలు ఉన్నట్టుండి దాడి చేశాయి.

తేనెటీగల్ని చూసిన మంత్రి, ఎమ్మెల్యేలు, వైఎస్సార్‌సీపీ కార్యకర్తలు పరుగులు తీశారు. వెంటనే మంత్రి అప్రమత్తమై కారులోనే ఉండిపోవడంతో ప్రమాదం తప్పింది. ఈ ఘటనలో ముగ్గురు ఎమ్మెల్యేలు, మంత్రి గన్‌మెన్లతో పాటూ మొత్తం 20మందికిపైగా గాయాలు అయ్యాయి. బాధితుల్ని హుటాహుటిన దగ్గరలోని ఆస్పత్రికి తరలించారు. ఎవరికీ ఎలాంటి ప్రమాదం లేదని డాక్టర్లు చెబుతున్నారు.