AP Bhavan: ‘ఐ లవ్ ఏపీ’గా మారిన ‘ఐ లవ్ అమరావతి’

ఢిల్లీలోని ఏపీ భవన్‌లో రాష్ట్ర రాజధాని అమరావతికి సంకేతంగా కనిపించే ‘ఐ లవ్‌ అమరావతి’ లైటింగ్‌ బోర్డు ‘ఐ లవ్ ఏపీ’గా మారింది. వాస్తవానికి ఈ బోర్డును తొలగించడంతో మీడియాలో వార్తలొచ్చాయి. టీడీపీ కూడా ఈ విషయమై ప్రశ్నించింది. ‘‘ఢిల్లీలోని ఏపీ భవన్ లో చంద్రబాబు హయాంలో ఏర్పాటు చేసిన 'ఐ లవ్ అమరావతి' బోర్డును పీకేశారు. విమర్శలు వెల్లువెత్తడంతో ఇప్పుడు కేవలం 'ఏ' అన్న అక్షరాన్ని మాత్రమే ఉంచారు. దీంతో 'ఏ' అంటే ఏమనుకోవాలని ప్రజలు ప్రశ్నిస్తున్నార’’ని సోషల్ మీడియాలో పోస్టు చేసింది.

ఇది రాజకీయ రంగు పులుము కోవడంతో అప్రమత్తమైన ఏపీ భవన్ అధికారులు మరుసటి రోజు దాన్ని ‘ఐ లవ్ ఏ’ అని మార్చారు. దీన్ని కూడా మీడియా హైలెట్ చేసింది. ‘ఐ లవ్ ఏ’ అంటే అర్థం ఏంటని ప్రశ్నించింది. ఈ రచ్చంతా ఎందుకని భావించిన అధికారులు ‘పీ’ అక్షరాన్ని చేర్చి దాన్ని ‘ఐ లవ్ ఏపీ’గా మార్చేశారు.

అలా ఐదు రోజుల్లో మూడుసార్లు మార్చేసి.. ‘ఐ లవ్ అమరావతి’ని కాస్తా ‘ఐ లవ్ ఏపీ’గా చేసేసి.. ఓ వివాదానికి ఫుల్ స్టాప్ పెట్టేశారు. మరి అసలు ఐ లవ్ అమరావతి అనే బోర్డును ఎందుకు తొలగించారో వారికే తెలియాలి. అమరావతి అనేది కూడా రాజధానిగా కొనసాగుతుందని జగన్ సర్కారు చెబుతున్న వేళ.. అమరావతి అనే పేరుకు కనిపించకుండా చేసేందుకు ఇంత ఉత్సాహం ఎందుకో అర్థం కావడం లేదు.
చంద్రబాబు నాయుడి హయాంలో అమరావతిని రాజధానిగా ప్రకటించాక.. ఏపీ భవన్లో ‘ఐ లవ్ అమరావతి’ బోర్డును ఏర్పాటు చేశారు. ఏపీ భవన్‌కు వచ్చిన వారు ఇక్కడ సెల్ఫీలు తీసుకునేవారు.