AP Assembly: జగన్‌ను ఉన్మాదన్న బాబు.. ఆయన విజ్ఞ‌తకే వదిలేస్తానన్న సీఎం

ఏపీ అసెంబ్లీలో ప్రతిపక్ష నేత చంద్రబాబు సీఎం జగన్‌పై చేసిన వ్యాఖ్యలపై దుమారం రేగింది. ఉదయం సభలోకి వస్తున్న సమయంలో చంద్రబాబు, టీడీపీ ఎమ్మెల్యేలు మార్షల్స్‌తో వాగ్వాదానికి దిగారు. ఈ సమయంలో బాబు ముఖ్యమంత్రి జగన్‌ను ఉన్మాది అని వ్యాఖ్యానించడంపై వైఎస్సార్‌సీపీ అభ్యంతరం తెలిపింది. చంద్రబాబు క్షమాపణ చెప్పాలని.. లేకపోతే ఎథిక్స్ కమిటీకి రిఫర్ చేయాలని డిమాండ్ చేశారు. దీంతో సభలో ఇరు పార్టీల సభ్యుల మధ్య మాటల యుద్ధం నడిచింది. ప్రశ్నోత్తరాలు కాకుండా.. ఈ వ్యాఖ్యలపై చర్చ నడిచింది.

Read Also: నేను గెలిచినా.. వైసీపీ అధికారంలోకి రాదన్నారు: మంత్రి అవంతి

దీంతో కలగజేసుకున్న ముఖ్యమంత్రి జగన్ ఈ విషయాన్ని అంతటితో ముగింపు పలకాలని సూచించారు. సభలో చర్చించాల్సిన అంశాలు చాలా ఉన్నాయని గుర్తు చేశారు. చంద్రబాబు దగ్గర నుంచి క్షమాపణ వస్తుందని ఎవరూ అనుకోవడం లేదని.. కొంతమంది కరుడుగట్టిపోయిన వారిలా ఉంటారని వ్యాఖ్యానించారు. అలాంటి వాళ్లలో మానవత్వం అనేది కనిపించదని.. చంద్రబాబు సభలోకి వచ్చే సమయంలో ఏం జరిగిందో అందరం (వీడియోను) చూశామన్నారు.

Also Read: 2430 జీవో, మూడు ఛానల్స్‌పై ఆంక్షలు.. ఏపీ అసెంబ్లీలో రగడ

చంద్రబాబు చుట్టూ ఉన్న భద్రతా సిబ్బంది ఎవర్నీ దగ్గరకు రానివ్వరని.. ఆయనే మార్షల్స్‌పై దౌర్జన్యం చేశారన్నారు జగన్. మార్షల్స్‌ను రెచ్చగొట్టే మాటలు మాట్లాడి.. తిరిగి వాళ్లపైనే నిందలు వేస్తున్నారన్నారు. ఈ జీవోను తీసుకొచ్చి అనవసరంగా రాద్దాంతం చేశారని.. ఈ చర్చకు ముగింపు లేకుండా పోతుందన్నారు. ఆ వ్యాఖ్యల్ని చంద్రబాబు విజ్ఞ‌తకే వదిలేస్తానని.. ఆయనకు మనసు, మానవత్వం లేదన్నారు. అది పైన దేవుడు చూసుకుంటున్నారన్నారు ముఖ్యమంత్రి. దీనిపై స్పందించిన స్పీకర్ తమ్మినేని.. సభ బయట, లోపల జరిగిన అంశాల్ని పరిశీలించి.. ఎథిక్స్ కమిటీకి రిఫర్ చేయాలా లేదా అన్నది నిర్ణయం తీసుకుంటామన్నారు.