Cyclone Amphan: ఏపీకి తుఫాన్ ముప్పు.. దూసుకొస్తున్న ఎంఫాన్

ఆగ్నేయ బంగాళాఖాతంలో ఏర్పడిన తీవ్ర అల్పపీడనం బలపేతమవుతోంది.. అది శనివారం వాయుగుండంగా మారి తుఫాన్‌గా మారే అవకాశం ఉందని ఐఎండీ అంచనా వేస్తోంది.. దీనికి ఎంఫాన్‌గా నామకరణం చేశారు. ఇది 17న వాయువ్య దిశగా కదులుతూ.. 18, 20కి ఉత్తర ఈశాన్య దిశగా బంగాళాఖాతం వైపు పయనిస్తుందని భావిస్తున్నారు. ప్రస్తుతం అండమాన్ నికోబార్ దీవులకు దక్షిణ దిశలో కిలోమీటర్ ఎత్తున ఎంఫాన్ తుఫాన్ కేంద్రీకృతమై ఉంది.

ప్రస్తుతం స్థిరంగా ఉన్న వాయుగుండం.. తుఫాన్‌గా మారిన తర్వాత దాని దిశను ఖచ్చితంగా అంచనా వేయడానికి వీలవుతుంది అంటున్నారు వాతావరణ నిపుణులు. ఇది పెను తుఫాన్‌గా మారేందుకు బంగాళాఖాతంలో ఏర్పడిన వాతావరణం అనుకూలంగా ఉందంటోంది వాతావరణ శాఖ. ఈ వాయుగుండం ప్రభావంతో ఏపీలోని కొన్ని జిల్లాల్లో శని, ఆదివారాల్లో ఉరుములు, మెరుపులతోపాటు తేలికపాటి నుంచి ఒక మోస్తరు వర్షాలు కురుస్తాయని ఐఎండీ చెబుతోంది.

ముఖ్యంగా ఉత్తరాంధ్ర, దక్షిణాంధ్ర, రాయలసీమ ప్రాంతాల్లో అక్కడక్కడా జల్లుల నుంచి ఒక మోస్తరు వర్షాలు కురుస్తాయని వాతావరణశాఖ అంచనా వేస్తోంది. కొన్నిచోట్ల భారీ వర్షాలకు అవకాశం ఉంది. రాయలసీమ, ఉత్తరాంధ్ర, దక్షిణ కోస్తాలో కొన్నిచోట్ల ఈదురు గాలులు వీస్తాయంటోంది ఐఎండీ. మూడు రోజుల పాటు బంగాళాఖాతం అల్లకల్లోలంగా ఉంటుందని.. మత్స్యకారులు బంగాళాఖాతంలో చేపల వేటకు వెళ్లకూడదని సూచించింది.