కృష్ణానదికి మరింత వరద.. ప్రకాశం బ్యారేజ్‌ వద్ద రెండో ప్రమాద హెచ్చరిక

ఎగువ ప్రాంతాల్లో కురుస్తోన్న భారీ వర్షాలకు కృష్ణానదికి మరోసారి వరద పోటెత్తింది. నారాయణపూర్‌, అలమట్టిల నుంచి శ్రీశైలం, అక్కడి నుంచి నాగార్జునసాగర్‌కు వరద ప్రవాహం కొనసాగుతోంది. గురువారం రెండు గంటల సమయానికి నాగార్జునసాగర్‌ నుంచి టెయిల్‌పాండ్‌‌కు 5,93,704 క్యూసెక్కుల వరదనీరు వస్తుండగా, పులిచింతలకు 6,22,670 క్యూసెక్కుల నీటిని విడుదల చేస్తున్నారు. పులిచింతల ప్రాజెక్టు నుంచి భారీగా వరద నీటిని దిగువకు విడుదల చేయడంతో ప్రకాశం బ్యారేజీకి ఇన్‌ఫ్లో పెరుగుతోంది. దీంతో ఒక్కసారిగా ప్రవాహం పెరగడం వల్ల ఆగస్టులో వచ్చిన విధంగా వరద వస్తుందని భయపడుతున్నారు.

శ్రీశైలం ప్రాజెక్టు ఇన్‌ఫ్లో 5.1 లక్షలు ఉండగా, ఔట్‌ఫ్లో 6.17 లక్షల క్యూసెక్కులుగా ఉంది. పూర్తిస్థాయి నీటినిల్వ 215 టీఎంసీలు కాగా.. ప్రస్తుతం 211.95 టీఎంసీలుగా ఉంది. కృష్ణమ్మ శ్రీశైలం నుంచి నాగార్జునసాగర్‌, పులిచింతల మీదుగా గురువారం సాయంత్రానికి ప్రకాశం బ్యారేజీకి చేరింది. ప్రస్తుతం ఇన్‌ఫ్లో 6 లక్షల క్యూసెక్కులకు చేరడంతో రెండో ప్రమాద హెచ్చరికను జారీచేశారు. ఔట్‌ఫ్లో 5.95 లక్షల క్యూసెక్కులుగా ఉంది. ఇందులో కాలువలకు 1,309 క్యూసెక్కులు విడుదల చేస్తున్నారు. పశ్చిమ ప్రధాన కాలువ, గుంటూరు ఛానల్‌కు నీటిని నిలిపివేశారు. వరద పెరగడంతో అధికారులను జిల్లా కలెక్టర్ అప్రమత్తం చేశారు.

బ్యారేజీ దిగువన ఉన్న కృష్ణలంక ప్రాంతంలోని తారకరామనగర్‌, రణదివే నగర్‌, భూపేష్‌ గుప్తా నగర్‌లోని కరకట్ట దిగువన ఉన్న ఇళ్లు మునిగాయి. ఇక్కడ నివసిస్తున్న ప్రజలను రాణిగారి తోటలోని పునరావాస కేంద్రానికి తరలిస్తున్నారు. రామలింగేశ్వరనగర్‌ దిగువున నిర్మించిన రక్షణ గోడ లోపలకు నీటి ఊట వచ్చింది. ఆ నీటిని మోటార్లతో తోడి నదిలోకి వదిలారు. పెనమలూరు మండలం పెదపులిపాక పంచాయతీలోని ఎన్టీఆర్‌ నగర్‌లో దిగువ ప్రాంతంలోని నివాసాల్లోకి నీరు చేరింది. కంకిపాడు మండలం మద్దూరు, కాసరనేనివారి పాలెం ప్రాంతాల్లో వరద ప్రవాహం ఎక్కువగా ఉంది.