అంతర్వేది ఘటనపై మంత్రి సీరియస్.. విచారణ కమిటి ఏర్పాటు

అంతర్వేది శ్రీ లక్ష్మీనరసింహస్వామి రథం దగ్ధంపై మంత్రి వెలంపల్లి శ్రీనివాస్ దిగ్భ్రాంతి వ్య‌క్తం చేశారు. తూర్పుగోదావరి జిల్లాలోని అంతర్వేది శ్రీలక్ష్మీనరసింహస్వామి ఆలయ ప్రాంగణంలోని రథం గత రాత్రి అగ్నికి ఆహుతయ్యింది. ఈ సమాచారం తెలిసిన దేవ‌దాయ శాఖ మంత్రి వెల్లంపల్లి... దేవ‌దాయ క‌మిష‌న‌ర్ పి.అర్జున‌రావు‌, జిల్లా ఎస్సితో ఫోన్ మాట్లాడారు. స‌హ‌య‌క చ‌ర్యులు చేప‌డుతున్న దేవ‌దాయ, పోలీస్‌, పైరింజ‌న్‌, రెవెన్యూ అధికారుల‌తో కూడా మాట్లాడి పరిస్థితిని సమీక్షించారు.

ఈ ఘటనపై విచార‌ణ అధికారిగా దేవ‌దాయ శాఖ అద‌న‌పు క‌మిష‌న‌ర్ రామ‌చంద్ర‌ మోహ‌న్‌ను నియ‌మించారు. ఈ పనికి పాల్పడిన వారిపై కఠిన చ‌ర్య‌లు చేప‌ట్టాల‌ని, దేవ‌దాయ శాఖ అధికారుల‌తో పాటు పోలీసులు సంబంధిత అధికారుల‌తో విచార‌ణ చేప‌ట్టాల‌ని అధికారుల‌ను అదేశించారు. అంతే కాకుండా అంతర్వేది శ్రీ లక్ష్మీనరసింహ స్వామి రథం పున నిర్మాణానికి చ‌ర్యులు చేప‌ట్టాల‌ని దేవ‌దాయ క‌మిష‌న‌ర్‌కు మంత్రి వెల్లంపల్లి సూచించారు.

Read More: అగ్నికి ఆహుతైన అంతర్వేది లక్ష్మీనరసింహస్వామి రథం

ఏపీలో ప్రముఖ పుణ్యక్షేత్రమైన అంతర్వేదిలో శనివారం అర్ధరాత్రి దాటిన తర్వాత స్వామివారి రథం అగ్నికి ఆహుతయ్యింది. రాత్రి ఒంటిగంట సమయంలో ఈ ఘటన చోటుచేసుకున్నట్లు తెలుస్తోంది. ఆలయ ప్రాంగణంలోని షెడ్డులో భద్రపరిచిన రథానికి మంటలు అంటుకొని దగ్ధం అయింది. అయితే ఇది ప్రమాదవశాత్తు జరిగిందా, ఆకతాయిల పనా అనేదానిపై పోలీసులు విచారణ చేపట్టారు.