పోలవరానికి అప్పటి దాకా నిధులివ్వలేం.. స్పష్టం చేసిన కేంద్ర మంత్రి

పోలవరం ప్రాజెక్టు విషయమై కేంద్ర జలశక్తి మంత్రి గజేంద్ర సింగ్ షెకావత్ మంగళవారం పార్లమెంట్‌లో కీలక వ్యాఖ్యలు చేశారు. ప్రాజెక్ట్ ఖర్చుకు సంబంధించిన ఆడిట్‌ డాక్యుమెంట్లు కేంద్రానికి పూర్తిగా అందలేదన్న ఆయన.. అవి తమకు అందే వరకూ తదుపరి నిధులు విడుదల చేయడం కుదరదన్నారు. పోలవరాన్ని జాతీయ ప్రాజెక్టుగా ప్రకటించడానికి ముందు రూ. 5 వేల కోట్లు ఖర్చు చేయగా.. ఆడిట్‌ పత్రాల్లో కేవలం రూ.3 వేల కోట్లకు సంబంధించిన పత్రాలే కేంద్రానికి అందాయన్నారు.

పోలవరం ప్రాజెక్టుకు నిధులు విడుదల చేయాలని ఆంధ్రప్రదేశ్ ఎంపీలు కేంద్రాన్ని కోరగా.. మంత్రి పై విధంగా స్పందించారు. కాంగ్రెస్‌ ఎంపీ కేవీపీ రామచంద్రరావు రాజ్యసభలో మంగళవారం పోలవరంపై సావధాన తీర్మానంపై ప్రవేశపెట్టారు. ఈ సందర్భంగా ఆయనతోపాటు రాష్ట్రానికి చెందిన ఎంపీలు పోలవరం విషయమై సభలో మాట్లాడారు.

‘‘పోలవరం ప్రాజెక్ట్‌ నిర్వాసితులకు చెల్లించాల్సిన నష్టపరిహారం, పునరావాస, పునఃనిర్మాణ పనుల కోసం తక్షణమే 16 వేల కోట్లు విడుదల చేయాలని రాజ్యసభలో జరిగిన చర్చలో విజయసాయి రెడ్డి కేంద్ర ప్రభుత్వానికి విజ్ఞప్తి చేశారు. పోలవరం రివర్స్ టెండరింగ్‌ను ఆయన సమర్థించారు.