మోదీకి అభినందనలు, కేంద్రం సాహసోపేత నిర్ణయం తీసుకుంది: పవన్ కళ్యాణ్

ఆర్టికల్ 370ను రద్దు చేస్తూ కేంద్రం తీసుకున్న నిర్ణయాన్ని జనసేన నేత పవన్ కళ్యాణ్ స్వాగతించారు. జమ్మూ కశ్మీర్‌కు ప్రత్యేక ప్రతిపత్తిని కల్పించే ఆర్టికల్ 370ని రద్దుచేయడం సాహసోపేతమైన నిర్ణయంగా ఆయన అభివర్ణించారు. ‘‘ఈ నిర్ణయంతో సుందర కశ్మీర్‌లో శాంతి నెలకొంటుందని నమ్ముతున్నాను. అఖండ భారతదేశం నుంచి పాకిస్థాన్ విడిపోయినప్పుడు జరిగిన హింసలో రెండు ప్రాంతాల నుంచి లక్షలాది మంది చనిపోయారని చదివినప్పుడు హృదయం వేదనకు గురయ్యింది.

ప్రత్యేక ప్రతిపత్తి రద్దు చేయడం కొన్ని ప్రాంతాల వారికి ఇబ్బంది కలిగించినప్పటికీ శాశ్వతంగా శాంతి నెలకొంటుందని విశ్వసిస్తున్నాను. ఇలాంటి సాహసోపేతమైన నిర్ణయం తీసుకున్న ప్రధాని నరేంద్ర మోదీ గారిని ఒక భారతీయుడిగా మనస్ఫూర్తిగా అభినందిస్తున్నాను. ఈ నిర్ణయంతో రెండు దేశాల మధ్య శాంతి నెలకొంటుందని ఆశిస్తున్నాను. దేశ సమగ్రత ముఖ్యం" అని పవన్ కళ్యాణ్ తెలిపారు. సోమవారం భీమవరంలోని జనసేన కార్యకర్తలు, నాయకుల సమావేశంలో పవన్ కళ్యాణ్ ఈ ప్రకటన చేశారు.
జమ్మూ కశ్మీర్ పునర్విభజన విషయమై టీడీపీ చీఫ్ నారా చంద్రబాబు నాయుడు ట్వీట్ చేశారు. ఆర్టికల్ 370ని రద్దు చేసే విషయంలో తెలుగు దేశం పార్టీ కేంద్రానికి మద్దతు తెలుపుతుందని బాబు తెలిపారు. జమ్మూ కశ్మీర్లో శాంతిసుస్థిరతలు వర్థిల్లాలని ఆయన ఆకాంక్షించారు.

ఆర్టికల్ 370 రద్దు, జమ్మూ కశ్మీర్ పునర్విభజన బిల్లుకు వైఎస్ఆర్సీపీ కూడా మద్దతు తెలిపింది. ప్రధాని మోదీ, అమిత్ షాలపై ఎంపీ విజయసాయి రెడ్డి పొగడ్తల వర్షం కురిపించారు.