Janasena లాంగ్‌ మార్చ్ ప్రారంభం.. విశాఖలో పవన్‌కు ఘన స్వాగతం..

ఇసుక కొరత కారణంగా నాలుగు నెలలుగా సమస్యలు ఎదుర్కొంటున్న భవన నిర్మాణ కార్మికులకు మద్దతుగా జనసేన అధినేత పవన్ కళ్యాణ్ విశాఖలో చేపట్టిన లాంగ్ మార్చ్ కొద్దిసేపటి క్రితమే ప్రారంభమైంది. మద్దిలపాలెంలోని తెలుగు తల్లి విగ్రహం వద్ద ర్యాలీని పవన్ కళ్యాణ్ ప్రారంభించారు. తాను ముందుండి నడిపిస్తుండగా జనసేన కార్యకర్తలు, కార్మికులు కథం తొక్కారు. పవన్‌ను చూసేందుకు అభిమానులు పోటీపడ్డారు. పవన్‌తో కరచాలనం చేసేందుకు అభిమానులు పోటీ పడడంతో భద్రతా సిబ్బంది కూడా నిలువరించలేకపోయారు.

మధ్యాహ్నం విశాఖ విమానాశ్రయానికి చేరుకున్న పవన్ కళ్యాణ్‌కు జనసైనికులు బ్రహ్మరథం పట్టారు. పెద్దఎత్తున విమానాశ్రయం వద్దకు చేరుకుని ఘన స్వాగతం పలికారు. మద్దిలపాలెంలోని తెలుగు తల్లి విగ్రహం వద్దకు చేరుకుని లాంగ్ ‌మార్చ్‌ని పవన్ ప్రారంభించారు. వేల మంది జనసేన నేతలు, కార్యకర్తలు వెంట నడిచారు. వివిధ ప్రాంతాల నుంచి తరలివచ్చిన కార్యకర్తలు, కార్మికులతో తెలుగుతల్లి సెంటర్ నిండిపోయింది. అడుగుతీసి అడుగు పెట్టలేని విధంగా కిక్కిరిసిపోవడంతో పవన్ కొద్దిసేపు వాహనానికే పరిమితమయ్యారు.

Also Read: వామ్మో మామూలుగా లేదుగా.. పులితో ఆటలాడుతున్న వైసీపీ ఎమ్మెల్యే..

తెలుగుతల్లి విగ్రహం నుంచి జీవీఎంసీ వద్దనున్న మహాత్మాగాంధీ విగ్రహం వరకూ భారీ ర్యాలీగా నడుచుకుంటూ వెళ్లాల్సి ఉంది. అయితే జనం కిక్కిరిసిపోవడంతో నడిచివెళ్లేందుకు వీలులేకపోవడంతో కొద్దిసేపు వాహనంపై నుంచి పవన్ కార్యకర్తలకు అభివాదం చేస్తూ ఉండిపోయారు. సుమారు లక్ష మంది వరకూ మార్చ్‌లో పాల్గొంటారని జనసేన అంచనా వేసింది. అందుకు అనుగుణంగానే జనసేన శ్రేణులు, కార్మికులు పోటెత్తారు.

ఇక లాంగ్ మార్చ్‌కి కాంగ్రెస్, బీజేపీ, సీపీఐ, సీపీఎం వేర్వేరు కారణాలతో దూరంగా ఉన్నాయి. ఒక్క తెలుగుదేశం మాత్రమే జనసేనకు మద్దతు ఇచ్చింది. టీడీపీ సీనియర్ నేతలు కింజరాపు అచ్చెన్నాయుడు, చింతకాయల అయ్యన్నపాత్రుడు లాంగ్ మార్చ్‌లో పాల్గొన్నారు. పవన్‌ని కలిసి సంఘీభావం తెలిపారు.