దిశ చట్టం ఏమైంది.. వాళ్లను వదలొద్దు: పవన్ కళ్యాణ్

తూర్పుగోదావరి జిల్లా రాజమహేంద్రవరం గ్యాంగ్ రేప్ ఘటనపై జనసేన అధినేత పవన్ కళ్యాణ్ స్పందించారు. ఇలాంటి ఘటనలు జరగడం బాధాకరమని.. నిందితుల్ని కఠినంగా శిక్షించాలని కోరారు. ఈ మేరకు ఓ ప్రకటనను విడుదల చేశారు. కుటుంబ పోషణ కోసం ఓ దుకాణంలో పని చేస్తున్న 16ఏళ్ల బాలికపై కొందరు కామాంధులు సామూహిక అత్యాదారానికి ఒడిగట్టిన ఘటన తీవ్రంగా కలచివేసిందన్నారు. అమానుషకరమైన ఈ ఘటన హృదయం ఉన్న ప్రతి ఒక్కరినీ కదిలిస్తుందని.. నాలుగు రోజులపాటు చిత్ర హింసలకు గురి చేసిన ఆ మృగాళ్లను కఠినంగా శిక్షించాలి అన్నారు.

తన కుమార్తె ఆచూకీ తెలియడం లేదని తల్లి పోలీస్‌ స్టేషన్‌ లో ఫిర్యాదు చేసిన సకాలంలో స్పందించలేదని తెలిసిందన్నారు పవన్. మహిళలపై అత్యాచారాలు నిరోధానికి తీసుకువచ్చిన దిశ చట్టం ఏమైపోయింది.. అసెంబ్లీలో ముక్తకంఠంతో ఆమోదం పొందిన ఆ చట్టం ఇంకా ఎందుకు అమలు కావడం లేదని ప్రశ్నించారు. తొలి దిశ పోలీస్‌ స్టేషన్‌ ఏర్పాటైన రాజమహేంద్రవరంలో సామూహిక అత్యాచార ఘటన జరిగిందని.. దిశ పేరుతో ఏర్పాటైన ఆ ప్రత్యేక పోలీస్‌ స్టేషన్లు ఏం చేస్తున్నాయన్నారు.
ఈ సామూహిక అత్యాచారం వెనక గంజాయి, డ్రగ్స్‌ ముఠాలు ఉన్నాయనీ.. ఇది బ్లేడ్‌ బ్యాచ్‌ పనే అని ఆ నగరవాసులు ఆందోళన చెందుతున్న విషయాన్ని పోలీస్‌ అధికారులు పరిగణనలోకి తీసుకోవాలి అన్నారు. అలాంటి ముఠాల ఆగడాలకు కళ్ళెం వేయకపోతే రక్షణ కరవవుతుందని.. చట్టం చేయడం కాదు.. వాటిని నిబద్ధతతో అమలు చేస్తేనే మహిళలకు రక్షణ కలుగుతుంది అన్నారు జనసేనాని.