జనసేనకు 22% ఓట్లు: 250 సర్పంచ్‌లు, 1,500 వార్డులు మావే.. పవన్ కళ్యాణ్ ప్రకటన

గ్రామీణ ప్రాంతాల్లో జనసేన పార్టీ బలంగా ఉందనే విషయాన్ని ఆంధ్రప్రదేశ్ పంచాయతీ ఎన్నికల ఫలితాల గణంకాలే రుజువు చేస్తున్నాయని ఆ పార్టీ అధినేత పవన్‌ కళ్యాణ్‌ వెల్లడించారు. మొదటి దశ ఎన్నికల్లో జనసేనకు 18 శాతానికి పైగా ఓట్లు రాగా.. రెండో విడతలో 22 శాతం దాటిందని చెప్పారు. జనసేన భావజాలం, పార్టీ శ్రేణుల మద్దతుతో రెండో దశలో 250కి పైగా సర్పంచ్, ఉప సర్పంచ్ స్థానాలు గెలిచామన్నారు. అలాగే 1,500పైగా పంచాయతీల్లో రెండో స్థానంలో నిలిచామని.. 1,500 వార్డులను కైవసం చేసుకున్నామని వివరించారు. ఈ మేరకు పవన్‌ పేరిట జనసేన పార్టీ ఓ ప్రకటన విడుదల చేసింది.

ఇక, పంచాయతీ ఎన్నికల్లో అధికార పార్టీ ఒత్తిళ్లు, బెదిరింపులు, ప్రలోభాలకు తట్టుకొని యువత, ఆడపడుచులు నిలబడటం నిజంగా గర్వకారణమని పవన్‌ కళ్యాణ్ అభినందనలు తెలిపారు. పోటీలో నిలిచినవారికి జనసైనికులు, నాయకులు అండగా నిలిచారని.. జనసేన మద్దతుదారుల గెలుపుతో రాష్ట్రంలో మార్పు మొదలైందన్నారు. గ్రామ వలంటీర్ల వ్యవస్థను అధికార పార్టీ ఎమ్మెల్యేలు దుర్వినియోగం చేస్తున్నారని పవన్‌ ఆరోపించారు. పంచాయతీ ఎన్నికల్లో ఓట్లు వేయని వారికి ప్రభుత్వ సంక్షేమ పథకాలు రద్దు చేస్తామంటూ వాళ్లతో బెదిరింపులకు దిగుతున్నారని.. కొన్ని చోట్ల ప్రత్యర్థులను కూడా కిడ్నాప్‌లు చేస్తున్నారని ఆరోపించారు.

వైఎస్సార్ కడప జిల్లాలో జనసేన పార్టీ మద్దతుదారుడిని కిడ్నాప్ చేయడం బాధాకరమని పవన్ అన్నారు. 151 మంది ఎమ్మెల్యేలు ఉండి కూడా జనసేన పార్టీ అంటే ఎందుకు భయపడుతున్నారని ప్రశ్నించారు. రెండో విడత ఎన్నికల్లో రాష్ట్రంలో పలుచోట్ల జనసేన జెండా రెపరెపలాడటం సంతోషాన్ని ఇచ్చిందన్నారు. ఏ రకంగా చూసినా ఏకగ్రీవాలు మంచిది కాదని.. పోటీతత్వం ఉండాలన్నారు. కేరళ రాష్ట్రంలో ఏకగ్రీవాలు చాలా తక్కువగా ఉంటాయని, ఏపీలో కూడా ఇలాగే ఉండాలన్నారు. తొలి రెండు దశల్లో కొనసాగించిన స్ఫూర్తిని, మిగతా రెండు విడతల్లోనూ పార్టీ నాయకులు, జన సైనికులు కొనసాగించాలని పవన్‌ కళ్యాణ్ ఆకాంక్షించారు.