మంత్రి అమర్నాథ్ టీడీపీకి కోవర్టు, ఎమ్మెల్యే టికెట్ కోసం అప్పట్లో.. జనసేన తీవ్ర ఆరోపణలు

కాంగ్రెస్ పార్టీ నుంచి బయటకు వచ్చాక తెలుగుదేశం పార్టీ టికెట్ కోసం ప్రయత్నించింది మీ అమ్మగారు నాగమణి కాదా? మీరు కాదా? అని రాష్ట్ర పరిశ్రమల శాఖ మంత్రి గుడివాడ అమర్నాథ్‌ను జనసేన పార్టీ ప్రధాన కార్యదర్శి శ్రీబొలిశెట్టి సత్యనారాయణ ప్రశ్నించారు. మంత్రి అమర్నాథ్ కుటుంబానికి తెలుగుదేశం పార్టీతో బంధాలు, సంబంధాలు గట్టిగా ఉన్నాయని తెలిపారు. మంత్రిగా ప్రస్థానం మొదలు పెట్టిన వెంటనే దిగజారుడు రాజకీయాలు చేస్తున్నారంటూ ఫైరయ్యారు.

ఈ మేరకు సోమవారం విశాఖపట్నంలో బొలిశెట్టి సత్య మీడియాతో మాట్లాడుతూ.. మంత్రి పదవి వచ్చిన రెండో రోజే తన శాఖ గురించి మర్చిపోయి ఇష్టానుసారం మంత్రి అమర్నాథ్ మాట్లాడుతున్నారని విమర్శించారు. జనసేన పార్టీ అధినేత పవన్ కళ్యాణ్ వ్యక్తిగత విషయాలను మంత్రి అమర్నాథ్ ప్రస్తావిస్తున్నారని విమర్శించారు.


భార్యాభర్తల మధ్య మనస్పర్ధలు వస్తే చట్టబద్ధంగా విడిపోవడం సాధారణ విషయమని.. దీనికి లేనిపోనివి ఆపాదిస్తూ పవన్ కళ్యాణ్ మాజీ భార్య రేణుదేశాయ్ ఈ మంత్రికి ఏదో చెప్పినట్లు మాట్లాడటం అత్యంత దుర్మార్గమని బొలిశెట్టి సత్య దుయ్యబట్టారు. ఈయన పరిశ్రమల శాఖ మంత్రి అయితే ఫ్యామిలీ వెల్ఫేర్ మంత్రిగా అవతారం ఎత్తారని విమర్శించారు. గుడివాడ అమర్నాథ్ అమ్మగారు టీడీపీ టికెట్ కోసం ప్రయత్నం చేసింది అప్పుడే మర్చిపోయినట్లున్నారని ఎద్దేవా చేశారు.

జనసేన పార్టీకి, తెలుగుదేశం పార్టీకి 2018 లోనే తెగతెంపులు అయ్యాయని.. పార్టీ ఆవిర్భావ సభ వేదికగా పవన్ కళ్యాణ్ అప్పట్లోనే టీడీపీ చర్యలను ఎండగట్టారని బొలిశెట్టి సత్య గుర్తు చేశారు. టీడీపీ తర్వాత వైసీపీలోకి వెళ్లింది మీ కుటుంబమేనని చెప్పారు. ఇప్పటికీ మీరు వైసీపీలోనే ఉండి టీడీపీ కోవర్టులుగా పని చేస్తూ ముఖ్యమంత్రి వైఎస్ జగన్మోహన్ రెడ్డికి చెడ్డ పేరు తెచ్చే పనుల్లో మునిగిపోయినట్లు కనిపిస్తోందని అనుమానం వ్యక్తం చేశారు.

కుల మీటింగుల్లో గంటలు గంటల తరబడి స్పీచ్ ఇవ్వడం.. కుల ఆత్మగౌరవాన్ని ఒకరి కాళ్ల వద్ద తాకట్టు పెట్టి మంత్రి పదవులు పొందడం మీకే చెల్లిందని మంత్రి అమర్నాథ్‌పై బొలిశెట్టి సత్య ఫైరయ్యారు. కులానికి మీరు ఏదో చేసిన గొప్ప మహానుభావుల్లాగా మాట్లాడవద్దని హితవు పలికారు.