Pawan Kalyan సాక్షిగా.. జనసేన ఎమ్మెల్యేకు అవమానం.. ఇదేంటి మనోహరా!

జనసేన అధినేత పవన్ కళ్యాణ్ సాక్షిగా.. ఆ పార్టీ ఏకైక ఎమ్మెల్యే రాపాక వరప్రసాద్‌కు అవమానం జరిగింది. పార్టీలో కీలకంగా మారిన సీనియర్ నేత నాదెండ్ల మనోహర్ ఎమ్మెల్యేను ఘోరంగా అవమానించారని సోషల్ మీడియాలో వీడియో వైరల్ అవుతోంది. ఓ దళిత ఎమ్మెల్యేను మరీ ఇలా ట్రీట్ చేస్తారా అంటూ విమర్శలొస్తున్నాయి. కొందరు జనసైనికులు కూడా ఈ వీడియోపై చిటపటలాడుతున్నారు. వైఎస్సార్‌సీపీ నేతలు కూడా ఎమ్మెల్యేకు మద్దతుగా.. నాదెండ్ల తీరుపై ఆగ్రహం వ్యక్తం చేస్తున్నారు.

Read Also: జగన్‌తో చిరు భేటీ .. వైసీపీ ఎమ్మెల్యే చెవిరెడ్డి పేరుతో పోస్ట్ వైరల్

జనసేన కొద్ది రోజుల క్రితం సమీక్షా సమావేశాన్ని ఏర్పాటు చేసింది. ఈ సమావేశానికి అధినేత పవన్ కళ్యాణ్‌తో పాటూ సీనియర్ నేత నాదెండ్ల మనోహర్‌లు అప్పటికే వచ్చారు. ఇక ఎమ్మెల్యే రాపాక వరప్రసాద్ కాస్త ఆలస్యంగా వచ్చారు. ఎమ్మెల్యే కదా నేరుగా వేదకిపైకి వెళ్లి పవన్‌ను పలకరించే ప్రయత్నం చేశారు. ఈలోపే కుర్చీలో నుంచి లేచిన మనోహర్ ‘మీరు ఆలస్యంగా వస్తే మేమేం చేయాలి. కుర్చీలు వేయాలా.. చీర పెట్టి, బొట్టు పెట్టి మిమ్మల్ని పిలవాలా..’అంటూ చిటపటలాడారు. దీంతో ఎమ్మెల్యే చేసేదేమీ లేక మనోహర్ పక్కన వేసిన కుర్చీలో కూర్చున్నారు.

ఈ వీడియో ఇప్పుడు సోషల్ మీడియాలో వైరల్‌గా మారింది. నాదెండ్ల మనోహర్ తీరుపై విమర్శలు మొదలయ్యాయి. దళిత ఎమ్మెల్యేను ఇంతగా అవమానిస్తారా.. పవన్ కళ్యాణ్ పక్కన కూర్చున్నా స్పందించకపోవడం దారుణమంటూ మండిపడుతున్నారు. ఒక శాసనసభ్యుడి పట్ల ఇలా అమర్యాదగా ప్రవర్తించడం ఏంటని వెంటనే పవన్ దీనిపై స్పందించాలంటున్నారు. మరి దీనిపై జనసేన ఎలాంటి వివరణ ఇస్తుందన్నది చూడాలి.