టార్గెట్ ఉత్తరాంధ్ర.. రంగంలోకి పవన్ కళ్యాణ్, అదే రోజు వైఎస్సార్‌సీపీ కూడా!

టార్గెట్ ఉత్తరాంధ్ర.. జనసేన పార్టీ (Janasena Party) అధినేత పవన్ కళ్యాణ్ (Pawan Kalyan) రంగంలోకి దిగారు. ఈ నెల15 పవన్ కళ్యాణ్ విశాఖలో పర్యటించనున్నారు. 16న ఉత్తరాంధ్ర జిల్లాల జనవాణి కార్యక్రమం నిర్వహించబోతున్నారు. ఈ పర్యటనలో ఉత్తరాంధ్ర జిల్లాలకు చెందిన నాయకులతో, పార్టీ వాలంటీర్లతో సమావేశం అవుతారు. అలాగే 15, 16, 17న ఉమ్మడి విశాఖపట్నం, విజయనగరం, శ్రీకాకుళం జిల్లాల నాయకులతో సమీక్షలు జరపనున్నారు. అలాగే జనసేన భవిష్యత్తు కార్యాచరణపై జనసేన పార్టీ నేతలకు, శ్రేణులకు దిశానిర్దేశం చేయనున్నారు. ఆయా జిల్లాల నుంచి ప్రజా సమస్యలపై వచ్చే వినతులను పవన్‌ కళ్యాణ్‌ స్వీకరిస్తారు.
పవన్ కళ్యాణ్ (Pawan Kalyan) పర్యటన ప్రారంభమయ్యే రోజే ఇటు వికేంద్రీకరణకు మద్దతుగా విశాఖలో కార్యక్రమాలు నిర్వహిస్తున్నారు. మూడు రాజధానులకు మద్దతుగా ఈనెల 15న విశాఖ గర్జన నిర్వహిస్తామని వైఎస్సార్‌సీపీ ప్రకటించిన సంగతి తెలిసిందే. ఇదే సమయంలో పవన్ పర్యటన కూడా ఉండటం ఆసక్తికరంగా మారింది. దేనికి గర్జనలు అంటూ ప్రభుత్వాన్ని టార్గెట్ చేస్తున్న జనసేనాని.. విశాఖలోని రుషికొండను అడ్డగోలుగా ధ్వంసం చేసినందుకా.. లేదా దసపల్లా భూములను సన్నిహితులకు ధారాదత్తం చేసేలా ఆదేశాలు ఇచ్చినందుకా అని జనసేనాని నిలదీశారు. మరి ఈ అంశాలపై పవన్ కళ్యాణ్ ఎలా స్పందిస్తారన్నది చూడాలి.