ప.గో: పోలీస్ స్టేషన్‌లో జనసేన పార్టీ కార్యకర్త ఆత్మహత్యాయత్నం

పశ్చిమ గోదావరి జిల్లాలో జనసేన కార్యకర్త ఆత్మహత్యాయత్నం కలకలంరేపింది. తాడేపల్లిగూడెంకు చెందిన జనసేన పార్టీ కార్యకర్త లోకేష్ నాయుడు పోలీస్ స్టేషన్‌లోనే పురుగల మందు తాగాడు. అతడ్ని వెంటనే పోలీసులు ఏరియా ఆస్పత్రికి తరలించారు.ఈ ఆస్పత్రి రెడ్ జోన్ పరిధిలో ఉండడంతో.. మెరుగైన చికిత్స నిమిత్తం ప్రైవేట్ ఆస్పత్రికి తరలించేందుకు కుటుంబ సభ్యులు ప్రయత్నించారు. కానీ అధికారులు మాత్రం అంగీకరించడం లేదు. దీంతో వారు ఆందోళన వ్యక్తం చేస్తున్నారు. అతడి ఆరోగ్య పరిస్థితి ప్రస్తుతం నిలకడగా ఉందని డాక్టర్లు చెబుతున్నారు.

తాడేపల్లిగూడెం ఎమ్మెల్యే కొట్టు సత్యనారాయణ తనను వేధిస్తున్నారని లోకేష్ నాయుడు ఆరోపణలు చేస్తున్నారు. తనపై తప్పుడు కేసులు బనాయించారనే మనస్తాపంతో ఉన్నాడని.. కొద్దిరోజులుగా మానసికంగా ఒత్తిడితో ఉన్నాడని కుటుంబ సభ్యులు చెబుతున్నారు. ఆ కారణంతోనే పోలీస్ స్టేషన్‌లో పురుగుల మందు తాగి ప్రాణాలు తీసుకునే ప్రయత్నం చేశాడంటున్నారు. ఈ ఆరోపణలపై ఎమ్మెల్యే స్పందించాల్సి ఉంది. మరోవైపు లోకేష్ ఆత్మహత్యాయత్నం గురించి తెలియడంతో స్థానిక జనసేన పార్టీ నేతలు, కార్యకర్తలు అతడ్ని పరామర్శించారు.