Pawan Kalyan: పవన్‌కు ట్విస్ట్ ఇచ్చిన జనసేన ఎమ్మెల్యే.. ఉన్నా లేనట్లేనట!

జనసేన పార్టీ ఏకైక ఎమ్మెల్యే రాపాక వరప్రసాదరావు మరోసారి ఆసక్తికర వ్యాఖ్యలు చేశారు. తాను జనసేన పార్టీకి దూరంగా లేను.. దగ్గరగా లేను అంంటున్నారు. పవన్‌ కళ్యాణ్‌.. తాను ఈ మధ్య కాలంలో కలవలేదని.. తనకు పార్టీ నుంచి ఎటువంటి సమాచారం రాలేదని చెప్పుకొచ్చారు. బుధవారం తిరుమల శ్రీవారిని దర్శించుకున్న ఆయన మీడియాతో మాట్లాడారు తాజా పరిణామాలపై స్పందించారు.

ముఖ్యమంత్రి వైఎస్‌ జగన్‌మోహన్‌రెడ్డి పాలన బాగుందన్నారు ఎమ్మెల్యే రాపాక వరప్రసాదరావు. తాను అభివృద్ధి వికేంద్రీకరణకు మద్దతు తెలుపుతున్నానని.. విశాఖపట్నం రాజధానిగా ఉంటే గోదావరి ప్రాంతాల్లో వెనుకబడిన ప్రాంతాలన్ని అభివృద్ధి చెందుతాయని అభిప్రాయపడ్డారు. ఉభయ గోదావరి జిల్లాలు అభివృద్ధి చెందాలంటే మూడు రాజధానులు అవసరమని.. తనకు ప్రభుత్వ విధానాలు నచ్చితే మద్దతు తెలుపుతానని ముందే చెప్పానని రాపాక గుర్తు చేశారు.

రాపాక వరప్రసాదరావు చాలా రోజులుగా పార్టీ కార్యక్రమాలకు దూరంగా ఉంటున్నారు. దాదాపు మూడు, నాలుగు నెలలుగా అధినేత పవన్‌ను కలవలేదు. జనసేన పార్టీ చేసిన నిరసన కార్యక్రమాలకు వెళ్లడం లేదు. అలాగే ప్రభుత్వ కార్యక్రమాల్లో పాల్గొంటూ షాకిచ్చారు. అసెంబ్లీలోనూ సీఎం జగన్‌పై ప్రశంసలు కురిపించారు. చాలా రోజుల తర్వాత మీడియా ముందుకు వచ్చిన ఆయన.. మళ్లీ ఆసక్తికర వ్యాఖ్యలు చేశారు. జనసేన పార్టీకి దూరంగా లేను.. దగ్గరగా లేను అంటూ ట్విస్ట్ ఇచ్చారు.