చరిత్రలో ఇది మొదటిసారి.. ఇంతకన్నా పెద్ద ఉదాహరణ ఇంకేం కావాలి: నాగబాబు

జగన్ సర్కార్‌‌ను టార్గెట్ చేశారు జనసేన పార్టీ పీఏసీ సభ్యుడు, మెగా బ్రదర్ నాగబాబు. చరిత్రలో తొలిసారి ఇలా జరిగిందంటూ ట్వీట్ చేశారు. 'చరిత్రలో మొదటిసారిగా ప్రభుత్వంపై గవర్నర్‌కు ఫిర్యాదు చేసిన ఉద్యోగ సంఘాలు. డీఏ, జీపీఎఫ్, ఏపీజీఎల్ఐ, రిటైర్మెంట్ ప్రయోజనాలందక, ఆందోళన చేయడానికి అనుమతివ్వక, ఆర్టికల్ 309 ప్రకారం ఉద్యోగ వ్యవస్థపై ప్రత్యక్ష సంబంధాలు, అధికారాలున్న గవర్నర్ కు మొర పెట్టుకునే స్థితికి తీసుకొచ్చారు. వై.సీ.పీ. అసమర్థత పరిపాలనకు ఇంతకన్నా పెద్ద ఉదాహరణ ఇంకేం కావాలి?' అన్నారు.
మరోవైపు ప్రభుత్వ ఉద్యోగులు గవర్నర్ బిశ్వభూషణ్ హరిచందన్‌ను కలిసిన సంగతి తెలిసిందే. ప్రధానంగా ఉద్యోగుల ఆర్థిక ప్రయోజనాలను రాష్ట్ర ప్రభుత్వం సకాలంలో చెల్లించడం లేదని ఫిర్యాదు చేశారు. ప్రభుత్వ ఉద్యోగులంతా నిస్సహాయ స్థితిలో ఉన్నారని ఏపీ ఉద్యోగుల సంఘం రాష్ట్ర అధ్యక్షుడు సూర్యనారాయణ అన్నారు. తమకు సకాలంలో వేతనాలు అందడం లేదని.. తాము బాగా ఇబ్బంది పడుతున్నామన్నారు. ఉద్యోగులకు ప్రతి నెలా ఒకటినే వేతనాలు ఇవ్వాలని.. కానీ ప్రభుత్వం పట్టించుకోవడం లేదని ఉద్యోగ సంఘ నేతలు ఆరోపించారు. అలాగే ఉద్యోగుల అనుమతి లేకుండా జీపీఎస్‌ను విత్‌డ్రా చేశారని.. 90 వేల మంది ఉద్యోగుల ఖాతాల నుంచి డబ్బులు తీసుకున్నారన్నారు. అయితే తాము ఈ అంశంపై ప్రశ్నిస్తే.. సాంకేతిక సమస్య వల్ల జరిగిందని అధికారులు చెబుతున్నారన్నారు. అన్ని విషయాలు గవర్నర్‌కు చెప్పామని.. సానుకూలంగా విన్నారన్నారు. తమకు న్యాయం చేస్తామని చెప్పారన్నారు.

రాష్ట్ర ప్రభుత్వం ఉద్యోగ సంఘాల నేతలతో అవమానకర రీతిలో వ్యవహరిస్తోందన్నారు నేతలు. తాము ఇప్పటికే ఆర్థిక శాఖ అధికారులు, మంత్రివర్గ పసంఘానికి సమస్యలు చెప్పామని.. వారు స్పందించకపోవడంతోనే గవర్నర్‌ను కలిసి ఫిర్యాదు చేశామన్నారు. బకాయిల చెల్లింపులపై జోక్యం చేసుకోవాలని గవర్నర్‌ను కోరామన్నారు నేతలు.

• Read Latest Andhra Pradesh News and Telugu News