‘రాజధాని అక్కడ.. ఇక్కడని చివరకు లేకుండా చేస్తారేమో?’

హైదరాబాద్‌లోని ప్రశాసన్‌నగర్‌లో పవన్ కళ్యాణ్ అధ్యక్షతన జనసేన పొలిట్‌బ్యూరో శుక్రవారం సమావేశమైంది. ఈ సమావేశంలో రాజధాని అమరావతిపై మంత్రి బొత్స సత్యనారాయణ చేస్తున్న వ్యాఖ్యలు ప్రస్తావనకు వచ్చాయి. ఏపీని శాశ్వత రాజధాని లేని రాష్ట్రంగా చేసి ప్రజలకు పాలనాపరమైన సౌలభ్యం లేకుండా చేయడమే వైఎస్‌ఆర్‌సీపీ ప్రభుత్వ విధానంలా ఉందని అభిప్రాయపడ్డారు. పిల్లి... తన పిల్లల్ని ఏడు ఇళ్లకు మారుస్తుందన్న చందంగా రాజధాని అక్కడ, ఇక్కడంటూ... చివరకు ఎక్కడా లేకుండా చేస్తారేమోనని ఆందోళన వ్యక్తమైంది.

రాజధానికి అనుకూలమైన ప్రాంతం అన్వేషణ, నిపుణుల కమిటీ పరిశీలన పేరిట ప్రభుత్వం కాలయాపన చేస్తోందని మండిపడింది. మంత్రి బొత్స తన ప్రకటనలతో ప్రజల్లో గందరగోళం సృష్టిస్తున్నారని పొలిట్‌బ్యూరో ఆగ్రహం వ్యక్తం చేసింది.

ఆంధ్రప్రదేశ్‌లో కొత్తగా తీసుకొచ్చిన ఇసుక విధానంతో నిర్మాణ, దాని అనుబంధ రంగాలను కుదేలయ్యాయని ఆరోపించారు. ఏకంగా 35 లక్షల మంది ఉపాధి కోల్పోయి రోడ్డునపడ్డారని, రాష్ట్ర ఆర్థిక వ్యవస్థ అతలాకుతలమైందని అభిప్రాయపడింది. రాజ్యాంగ స్ఫూర్తిని, అది ప్రసాదించిన హక్కులను యువతకు తెలియజేసేందుకు మేధోమథనం చేపట్టాలని ఈ సమావేశంలో నిర్ణయించారు. ఆర్టికల్‌ 370 రద్దు జమ్మూ కశ్మీర్‌లో అభివృద్ధికి దోహదపడుతుందని అభిప్రాయపడుతూ తీర్మానాన్ని ఆమోదించారు.

అయితే, దేశ ఆర్థిక పరిస్థితిపై సమగ్రంగా చర్చించి మూడు అంశాలను కేంద్రానికి సూచించింది. చిన్నతరహా నుంచి పెద్ద పరిశ్రమల వరకు అనుమతులు సులభంగా లభించేలా వ్యవస్థ రూపకల్పన, సింగిల్‌ విండో విధానం, ఆర్థిక సాయం అందించడం లాంటివి చేపట్టాలని పేర్కొంది. నదులు, చిన్ననీటి వనరులను కాలుష్యం బారి నుంచి కాపాడేలా కార్యాచరణ రూపొందించి, కార్తీక మాసంలో వనసంరక్షణ నిర్వహించాలని నిర్ణయించారు.