MLC Anantha Babu కు 14 రోజుల రిమాండ్.. రాజమండ్రి సెంట్రల్ జైలుకు తరలింపు!

తన మాజీ డ్రైవర్ సుబ్రహ్మణ్యం హత్య కేసులో నిందితుడు, అధికార వైఎస్సార్ కాంగ్రెస్ పార్టీ ఎమ్మెల్సీ అనంత ఉదయ్ భాస్కర్ బాబు అలియాస్ అనంతబాబుకు కోర్టు 14 రోజుల రిమాండ్‌ విధించింది. దీంతో సోమవారం ఎమ్మెల్సీ అనంతబాబును రాజమండ్రి సెంట్రల్‌ జైలుకు తరలించనున్నట్లు పోలీసు అధికారులు వెల్లడించారు. అంతకు ముందు ఎమ్మెల్సీ అనంతబాబును కోర్టు ముందు పోలీసులు ప్రవేశపెట్టగా.. జూన్ 6వ తేదీ వరకు జడ్జి రిమాండ్‌ విధించారు. దీంతో మెజిస్ట్రేట్‌ వద్ద డ్యాక్యుమెంటేషన్‌ పూర్తికాగానే అనంతబాబును కాకినాడ నుంచి రాజమండ్రి సెంట్రల్‌ జైలుకు తరలించనున్నారు.

కాగా, తన మాజీ డ్రైవర్ హత్య కేసులో మౌఖిక సాక్ష్యాలతో పాటు సాంకేతిక పరమైన ఆధారాలు, ఫోరెన్సిక్ సైన్స్ పరమైన సాక్ష్యాలు, ఫోరెన్సిక్ మెడిసిన్ పరమైన సాక్ష్యాలు, ముద్దాయిని ప్రశ్నించిన తర్వాత ఎమ్మెల్సీ అనంతబాబును పోలీసులు అరెస్ట్ చేసిన విషయం తెలిసిందే. సుబ్రహ్మణ్యంను ఎమ్మెల్సీ అనంతబాబు హత్య చేసినట్లు పక్కాగా ఆధారాలు లభించడంతో అదుపులోకి తీసుకున్నారు.

కాగా, ఎమ్మెల్సీపై ఐపీసీ సెక్షన్ 302, ఎస్సీ, ఎస్టీ అట్రాసిటీ కేసు నమోదు చేశారు పోలీసులు. అయితే ఇది ప్లానింగ్ ప్రకారం జరిగిన మర్డర్ కాదనీ.. ఇద్దరి మధ్య జరిగిన గొడవలో సుబ్రహ్మణ్యం ప్రాణాలు కోల్పోయారని పోలీసులు చెబుతున్నారు. ప్రస్తుతం కోర్టు ఆదేశాలతో అనంతబాబును 14 రోజుల పాటు రిమాండ్‌కు తరలించనున్నారు.