అనంతపురం: వైసీపీ మహిళా ఎమ్మెల్యేపై అభ్యంతరకర పోస్ట్.. ఇద్దరి అరెస్ట్

అనంతపురం జిల్లా కళ్యాణదుర్గం వైఎస్సార్‌సీపీ ఎమ్మెల్యేపై సోషల్ మీడియాలో అభ్యంతకరమైన పోస్ట్ పెట్టిన ఇద్దర్ని పోలీసులు అరెస్ట్ చేశారు. అనంతపురం జిల్లాకు చెందిన వీరిలో ఒకర్ని బెంగళూరులో అరెస్ట్ చేసి కళ్యాణదుర్గం తీసుకొచ్చారు. ఈ నెల 13న కళ్యాణదుర్గం టీడీపీ ఫేస్‌బుక్ పేజీలో అభ్యంతరకరమైన వ్యాఖ్యలు చేస్తూ పోస్ట్ పెట్టారు. ఈ పోస్టుకు నారాయణపురానికి చెందిన మరో కార్యకర్త షేర్ చేశాడు.

ఎమ్మెల్యే ఉషా శ్రీ చరణ్‌పై అసభ్యకరమైన పోస్ట్ పెట్టారని వైఎస్సార్‌సీపీ నేత భాస్కర్‌రెడ్డి కళ్యాణదుర్గం పోలీసులకు ఫిర్యాదు చేశారు. దీంతో కేసు నమోదు చేసిన పోలీసులు ఇద్దర్ని అరెస్ట్ చేశారు. వీరిలో ఒకరు బెంగళూరులో ఉండగా.. అక్కడికి వెళ్లి అరెస్ట్ చేశారు. ఇద్దరు నిందితుల్ని పోలీసులు కోర్టులో హాజరుపరిచారు. ఇదిలా ఉంటే టీడీపీ కార్యకర్తలపై అక్రమంగా కేసులు బనాయిస్తున్నారని ఆ పార్టీ నేతలు ఆరోపిస్తున్నారు. టీడీపీ నియోజకవర్గ ఇంఛార్జ్ మాదినేని ఉమామహేశ్వర నాయుడు స్టేషన్‌కు వెళ్లారు. ఇద్దరు కార్యకర్తలకు స్టేషన్ బెయిల్ మంజూరు చేయాలని డిమాండ్ చేశారు.

ఇటీవల ఏపీ ప్రభుత్వం సోషల్ మీడియాలో ఆడవాళ్లపై అసభ్యంగా, అభ్యంతరకంగా పోస్టులు పెడితే కఠిన చర్యలు తప్పవని హెచ్చరించింది. ఈ మేరకు దిశ బిల్లులో కూడా పొందుపరిచారు. దీని ప్రకారం మహిళలు, చిన్నారులను కించపరుస్తూ.. సోషల్ మీడియాలో అసభ్య పోస్టులు పెట్టిన వారిపై చర్యలు తీసుకుంటారు. మొదటిసారి తప్పు చేస్తే రెండేళ్లు, రెండోసారి తప్పు చేస్తే నాలుగేళ్లు జైలుశిక్ష విధిస్తారు. చిన్నారులపై లైంగిక దాడులకు పాల్పడితే ప్రస్తుతం ఉన్న చట్టాల ప్రకారం గరిష్టంగా ఐదేళ్ల శిక్ష మాత్రమే పడుతుంది. కాగా.. నేరాల్లో తీవ్రతను బట్టి వారికి గరిష్టంగా జీవిత ఖైదు విధించేలా బిల్లులో పొందుపరిచారు.