Konidela Nagababu: నాన్నా అప్పుడు నాకు ఆ జ్ఞానం లేదు.. ఇప్పుడు నువ్వు లేవు.. నాగబాబు ఎమోషనల్

సినీ నటుడు, జనసేన నేత కొణిదెల నాగబాబు తన తండ్రికి జన్మదిన శుభాకాంక్షలు తెలిపారు. ‘‘నాన్నా నీకు జన్మదిన శుభాకాంక్షలు, నువ్వు బ్రతికి వున్నప్పుడు చెప్పాలన్న సెన్స్ గాని జ్ఞానం కానీ నాకు లేవు... అవి వచ్చాయనుకున్నప్పుడు నువ్వు లేవు’’ అంటూ సోషల్ మీడియాలో ఆయన పోస్టు చేశారు. ప్రతి ఒక్కరు తమ ఎమోషన్లు, ప్రేమను మీ ఆత్మీయులతో వారు బతికి ఉన్నప్పుడే పంచుకోండని ఆయన సూచించారు. మరోసారి హ్యాపీ బర్త్ డే డాడ్.. అంటూ నాగబాబు ఫేస్‌బుక్‌లో తన తండ్రి ఫొటోను పోస్టు చేశారు. ఇటీవలే ఫాదర్స్ డే సందర్భంగా చిరంజీవి సైతం తన తండ్రితో కలిసి దిగిన ఫొటోను ట్వీట్ చేసిన సంగతి తెలిసిందే. మెగాస్టార్ చిరంజీవి రాజకీయాలకు దూరంగా ఉంటూ.. సినిమాలకే పరిమితం కాగా.. నాగబాబు మాత్రం తన తమ్ముడి పార్టీ జనసేనలో యాక్టివ్‌గా ఉంటున్నారు. ఇటీవలే ఆయన ఉత్తరాంధ్ర జిల్లాల్లో పర్యటించారు. మెరుగైన భవిత కోసం.. మెరుగైన రాష్ట్రం కోసం.. మెరుగైన భావితరాల భవిత కోసం.. జనసేనకు ఒక్క ఛాన్స్ ఇవ్వాలని ఆయన ప్రజలను కోరుతున్నారు.
ఇక మెగా ఫాదర్ కొణిదెల వెంకట్రావు విషయానికి వస్తే.. ఆయన పోలీసు కానిస్టేబుల్‌గా పని చేశారు. బాపు దర్శకత్వం వహించిన మంత్రిగారి వియ్యంకుడు సినిమాలో ఆయన నటించారు. వెంకట్రావు 2007 డిసెంబర్లో చనిపోయారు. గుండె సంబంధిత సమస్యలతో బాధపడిన ఆయన కోలుకుంటున్న దశలో హార్ట్ ఎటాక్‌తో చనిపోయారు. నాన్నకు కోపం ఎక్కువే.. ప్రేమ కూడా ఎక్కువేనని.. ఆ ప్రేమకు బాధ్యత కూడా ఎక్కువేనని గతంలో చిరంజీవి తన తండ్రి గురించి తెలిపారు.