ఎగువ నుంచి వస్తున్న భారీ వరద నీటితో కృష్ణానది పరవళ్లు తొక్కుతోంది. శ్రీశైలం డ్యామ్ నుంచి ప్రకాశం బ్యారేజీ వరకు అన్ని జలాశయాలు గేట్లు ఎత్తి నీటిని కిందికి విడుదల చేస్తున్నాయి. భారీ వరద నీటితో కృష్ణానది పరివాహక ప్రాంతంలోని అనేక గ్రామాలు వరద ముంపులో చిక్కుకున్నాయి. కృష్ణా నది ప్రమాదకర రీతిలో ప్రవహిస్తున్న కారణంగా కృష్ణానదికి అనుసంధానంగా ఉన్న వాగులు పొంగుతూ గ్రామాల్లోకి వరద నీరు వచ్చి చేరుతుంది. కృష్ణా జిల్లా చందర్లపాడు మండలంలోని ఉస్తేపల్లి కాసరబాద, రామన్నపేట సంగళ్లపాలెం పలు గ్రామాలకు వరదముప్పు పొంచి ఉండటంతో అధికారులు అప్రమత్తమయ్యారు.
కంచికచర్ల మండలం చెవిటికల్లు గ్రామం పూర్తిగా జలదిగ్బంధంలో చిక్కుకోవడంతో బాహ్య ప్రపంచంతో సంబంధాలు తెగిపోయాయి. ఇళ్లల్లోకి వరద నీరు చేరడంతో ప్రజలు ఇబ్బందులు పడుతున్నారు. పదేళ్ల తర్వాత ఇలాంటి వరద చూస్తున్నామని గ్రామస్థులు చెబుతున్నారు. గ్రామం నుంచి బయటకు వెళ్లేందుకు రవాణా సౌకర్యం లేదని, అత్యవసర పనుల కోసం కేవలం నలుగురు మాత్రమే పట్టే నాటు పడవ వినియోగిస్తున్నట్లు చెబుతున్నారు. గనిఆతుకూరులో మధ్య నుంచి ప్రవహించే వాగు ఉప్పొంగడంతో ఆ గ్రామం రెండు విడిపోయింది. మొగులూరు కునికినపాడు, మున్నలూరు, చెవిటికల్లు, గని అత్కూరు, బత్తినపాడు గ్రామాల్లో వరద కారణంగా వేలాది ఎకరాలలో పంట పొలాలు నీట మునిగాయి. అటు జగ్గయ్యపేట మండలం ముక్త్యాల, వెదాద్రి రావిరాల, జయంతిపురం గ్రామాల్లోకి వరద నీరు చేరింది. వరద ముంపునకు గురయ్యే గ్రామాల ప్రజలను పునరావాస కేంద్రాలకు తరలించేందుకు పోలీసులు, రెస్క్యూ సిబ్బంది ప్రయత్నాలు చేస్తున్నారు.