నెల్లూరు: ఇసుకలో బయటపడ్డ పురాతన ఆలయం.. పెద్ద చరిత్రే ఉంది

నెల్లూరు జిల్లాలో పురాతన ఆలయం బయటపడింది. ఇసుకలో గ్రామస్థులు తవ్వకాలు జరిపి వెలికితీశారు. నెల్లూరు జిల్లాలోని చేజర్ల మండలం పెరుమాళ్లపాడు సమీపంలో పెన్నా నది ఒడ్డున ఇసుక మేటల ధాటికి 80ఏళ్ల కిందటే నది నుంచి రెండు మైళ్లు దూరం జరిగింది. అయితే 200ఏళ్ల నాగేశ్వరాలయం మాత్రం అక్కడే ఉంది.. అది కూడా తర్వాత కనిపించకుండా ఇసుక మేట వేసింది. గ్రామ ప్రజలు ఎప్పటి నుంచో ఆ ఆలయం వెలికి తీయాలని అనుకున్నారు.

ఈ విషయం తెలుసుకున్న స్థానిక యువకులు ఆలయాన్ని బయటకు తీయాలని భావించారు. కరోనా, లాక్‌డౌన్ కారణంగా యువకులు ఊరికి వచ్చారు.. అధికారుల దగ్గర అనుమతి తీసుకున్నారు. అందరూ చందాలు వేసుకుని మంగళవారం యంత్రాలతో ఇసుక తొలగించారు.. ఆ మేటల కింద పరశురాముడు ప్రతిష్ఠిత నాగేశ్వరస్వామికి వేమన కుటుంబీకులు నిర్మించిన ఆలయం బయటపడింది. 200 ఏళ్ల క్రితం దీనిని నిర్మించారని చెబుతున్నారు. ఈ దేవాలయాన్ని పరశురాముడు ప్రతిష్టించారంటున్నారు.