సీఎం జగన్‌‌పై అసభ్యకర పోస్టింగ్‌.. యువకుడి అరెస్ట్

ఆంధ్రప్రదేశ్ ముఖ్యమంత్రి వైఎస్ జగన్‌మోహన్‌‌రెడ్డిపై సోషల్ మీడియాలో అసభ్యకర పోస్ట్ పెట్టిన యువకుడ్ని పోలీసులు అరెస్ట్ చేశారు. అనంతపురం జిల్లా విడపనకల్లు మండలం గడేకల్లుకు చెందిన రాజేష్‌.. తన ఫేస్‌బుక్‌ అకౌంట్‌లో ఈ నెల 12న ఫేస్‌బుక్‌లో జగన్‌పై అసభ్యకర వీడియోను పోస్ట్‌ పెట్టాడు. ఈ వీడియోను గమనించిన కొందరు వైసీపీ కార్యకర్తలు పోలీసులకు ఫిర్యాదు చేశారు. ఈ ఫేస్‌బుక్ పోస్టుపై పోలీసులు దర్యాప్తు ప్రారంభించారు. రాజేష్ ఈ వీడియోను పోస్ట్ చేసినట్లు గుర్తించి అదుపులోకి తీసుకున్నారు. అతడిపై ఐపీసీ 59/19 యూ/505(2), 507, 153ఎ సెక్షన్ల కింద కేసు నమోదు చేశారు. అతడ్ని మెజిస్ట్రేట్‌ ఎదుట హాజరుపర్చగా రిమాండ్‌ విధించారు. ఆ యువకుడ్ని జైలుకు తరలించారు పోలీసులు.

గతంలో కూడా సోషల్ మీడియాలో సీఎం జగన్‌పై అసభ్యకరమైన పోస్టింగులు పెట్టిన వారిని పోలీసులు అరెస్ట్ చేశారు. కృష్ణాజిల్లాకు చెందిన ఇద్దర్ని.. చిత్తూరు జిల్లాకు చెందిన మరొకరిపై కేసులు నమోదయ్యాయి. ఫేస్‌బుక్‌లో ప్రముఖలపై అసభ్యకర పోస్టింగ్‌లు, షేర్‌లు చేసి కేసుల్లో ఇరుక్కోవద్దని పోలీసులు హెచ్చరిస్తున్నారు. డీజీపీ గౌతమ్ సవాంగ్ కూడా గతంలోనే పోస్ట్‌ల విషయంలో జాగ్రత్తగా ఉండాలని హెచ్చరించారు.