ఇది రాచరికం కాదు.. ఊర్మిలపై సంచయిత సంచలన వ్యాఖ్యలు

ఉత్తరాంధ్రుల కల్పవల్లి, విజయనగరం ఇలవేల్పు పైడితల్లి అమ్మవారి సిరిమానోత్సవం సందర్భంగా చోటుచేసుకున్న వ్యవహారంపై మాన్సాస్‌ ట్రస్ట్‌ చైర్‌పర్సన్‌ సంచయిత గజపతిరాజు కార్యాలయం ఓ లేఖను విడుదల చేసింది. సిరిమానోత్సవంలో ట్రస్ట్‌ చైర్‌పర్సన్‌కు ముందు వరుసలో సీటు కేటాయించడం ఆనవాయితీ అని చైర్‌పర్సన్ వివరించారు. కొంతమంది ఎలాంటి ముందస్తు సమాచారం లేకుండా నేరుగా వచ్చి ముందు వరుసలో కూర్చున్నారని, పుసపాటి అనంద గజపతిరాజు కుమార్తె ఊర్మిళ, ఆమె తల్లి సుధా గజపతి రాజు ఈవో పక్కన కూర్చొని సిరిమాను ఉత్సవాన్ని వీక్షించారని పేర్కొన్నారు. అయినప్పటికీ తమకు సీట్లు కేటాయించలేదంటూ వారు మీడియాకు చెప్పడం బాధాకరమని మాన్సాస్‌ కార్యాలయం లేఖలో విచారం వ్యక్తం చేసింది.

వారిని మహారాణి, రాజకుమార్తెలాగా చూడాలని కోరుకుంటున్నారని, కానీ సిరిమానోత్సవం ప్రజల పండుగని మాన్సాస్ చైర్‌పర్సన్ పేర్కొన్నారు. ప్రజాస్వామ్యంలో ఇంకా కొంతమంది రాచరికం కోరుకోవడం దురదృష్టకరమని ఘాటు వ్యాఖ్యలు చేశారు. ఊర్మిళ తల్లి, ఊర్మిళ ప్రవర్తించిన తీరు అహంకారపూరితమని మాన్సాస్ కార్యాలయం ఆగ్రహం వ్యక్తం చేసింది.

కాగా, దసరా పండుగ సందర్భంగా గత మంగళవారం పైడితల్లి అ‍మ్మవారి సిరిమానోత్సవాన్ని ఘనంగా నిర్వహించిన విషయం తెలిసిందే. అయితే మన్సాస్‌ ట్రస్ట్‌ చైర్మన్‌ కోసం ముందు వరుసలో ఏర్పాటు చేసిన కుర్చీలో ఊర్మిలా, ఆమె తల్లి కూర్చోవడంపై మన్సాస్‌ ట్రస్ట్‌ బోర్డు చైర్‌పర్సన్‌ సంచయిత గజపతిరాజు తీవ్ర అసంతృప్తి వ్యక్తం చేశారు. ఈ క్రమంలోనే వారి తీరును ఖండిస్తూ లేఖను విడుదల చేశారు.

కాగా, సిరిమానోత్సవం సాక్షిగా తమకు అవమానం జరిగిందని ఊర్మిల ఆరోపించారు. తమను కోట నుంచి బయటకు పంపాలంటూ పోలీసులు, దేవాదాయ అధికారులను సంచయిత పురమాయించడం విచారకరమన్నారు. కోటపై ముందు వరుస నుంచి వెళ్లిపోవాలని సంచయిత ఆదేశించారని.. తమను కోటలోకి ఎవరు అనుమతించారంటూ సిబ్బందిని నిలదీశారని తెలిసిందన్నారు. అంతా తానే అన్నట్లు సంచయిత వ్యవహరిస్తున్నారని.. మాన్సాస్ తన సొంత సంస్థలా అధికారం చెలాయిస్తున్నారని మండిపడ్డారు. సంచయిత చేష్టలు ఆనందగజపతికి అవమానకరమని వ్యాఖ్యానించారు. కోట బురుజులపై నుంచి సరిమానోత్సవం తిలకించడం తమ వారసత్వ హక్కు అన్నారు