థ్యాంక్స్ సీఎం జగన్: వేలాది కుటుంబాలకు మీ సాయం, గ్రేట్.. చిరంజీవి ప్రశంసలు

కరోనా కష్టకాలంలో నష్టాల్లో నడుస్తున్న టాలీవుడ్ చిత్ర పరిశ్రమ కోసం జగన్ ప్రభుత్వం రాయితీలను ప్రకటిస్తూ ఉత్తర్వులు జారీ చేసిన తరుణంలో.. ముఖ్యమంత్రి వైఎస్ జగన్మోహన్ రెడ్డికి మెగాస్టార్ చిరంజీవి కృతజ్ఞతలు తెలియజేశారు. సినిమా థియేటర్లకు విద్యుత్‌ చార్జీలు, వడ్డీ రాయితీలు పొడిగిస్తూ ఏపీ ప్రభుత్వం తీసుకున్న నిర్ణయంపై చిరంజీవి హర్షం వ్యక్తం చేశారు. సినీ కళాకారులను ఆదుకున్న ముఖ్యమంత్రి వైఎస్‌ జగన్‌మోహన్‌రెడ్డికి ట్విట్టర్‌ వేదికగా కృతజ్ఞతలు తెలిపారు. కోవిడ్‌ విపత్కర పరిస్థితుల్లో సినిమా ఇండస్ట్రీకి కోలుకోవడానికి అవసరమైన విధంగా ఆదుకున్నారని ప్రశంసించారు. సీఎం జగన్‌ సాయంతో వేలాది కుటుంబాలకు ఊరట లభించిందని చిరంజీవి ట్వీట్‌ చేశారు.


కాగా, కరోనా వైరస్ మహమ్మారి కారణంగా భారీగా దెబ్బతిన్న సినీ పరిశ్రమకు ఏపీ ప్రభుత్వం అండగా నిలిచింది. సినిమా థియేటర్లకు సంబంధించి విద్యుత్‌ చార్జీలు, వడ్డీ రాయితీలను మరికొంత కాలం పొడిగిస్తూ ప్రభుత్వం నిర్ణయం తీసుకుంది. ఏప్రిల్‌, మే, జూన్‌ నెలల విద్యుత్‌ ఫిక్స్‌డ్‌ చార్జీలకు మినహాయింపునిస్తూ ప్రభుత్వం ఉత్తర్వులు జారీ చేసింది. ఈ నిర్ణయంతో సినిమా థియేటర్ల యజమానులకు భారీ ఊరట లభించనుంది.