జాతీయ జెండాను తలకిందులుగా ఎగరేసిన ఏపీ మంత్రి!

విశాఖపట్నంలో నిర్వహించిన రిపబ్లిక్ డే వేడుకల్లో తప్పిదం దొర్లింది. నగర వైఎస్ఆర్సీపీ ఆధ్వరంలో నిర్వహించిన గణతంత్ర దినోత్సవ వేడుకల్లో.. మంత్రి అవంతి శ్రీనివాస రావు జాతీయ జెండాను ఎగరేశారు. కానీ ఆయన పొరబాటున జాతీయ జెండాను తలకిందులుగా ఎగరేశారు. అక్కడున్న వారెవరూ ఈ తప్పిదాన్ని వెంటనే గుర్తించకుండా జాతీయ గీతాన్ని ఆలపించడం గమనార్హం. కాసేపటి తర్వాత తప్పిదాన్ని గుర్తించిన నేతలు జెండాను కిందకు దించి.. సరిగా ఎగరేశారు. ఉద్దేశ పూర్వకంగా తలకిందుకులుగా ఎగరేస్తే.. జాతీయ జెండాన్ని అవమానించినట్టుగా భావిస్తారు.

ఈ వీడియోను టీడీపీ శ్రేణులు సోషల్ మీడియాలో వైరల్ చేస్తున్నాయి. మంత్రి తీరు పట్ల మండి పడుతూ ఫేస్‌బుక్‌లో పోస్టులు పెడుతున్నారు. ‘‘ఈ రివర్స్ గ్యాంగ్ భారత జాతీయ జెండాని కూడా రివర్స్ లో ఎగరేసి అవమానించిన వైకాపా మంత్రి అవంతి శ్రీనివాస్ ఇప్పుడు మన ఆంధ్ర ప్రదేశ్ అభివృద్ధిని కూడా రివర్స్ లోకి తీసుకెళ్తుంది’’ అని కొందరు ఫేస్‌బుక్‌లో పోస్టులు పెట్టారు.

విశాఖ జిల్లాలోని నర్సీపట్నం సబ్ కలెక్టర్ ఆఫీసులో జరిగిన గణతంత్ర దినోత్సవాల్లో అపశృతి చోటు చేసుకుంది. సిబ్బంది నిర్లక్ష్యం కారణంగా జాతీయ పతాకాన్ని ఆవిష్కరిస్తుండగా.. స్తంభంపై ఉన్న చక్రం విరిగి జాతీయ జెండా కిందపడింది. అనంతరం మళ్లీ సరిచేసి జాతీయ జెండా ఎగరేశారు.