Nara Lokesh పదవి పోతుందనే బాబు భయం: బొత్స

శాసన మండలిని కొనసాగిస్తారా? లేదంటే రద్దు చేస్తారా? అనేది సోమవారం తేలుతుందని మంత్రి బొత్స తెలిపారు. మండలి అవసరమా అని సీఎం జగన్ అసెంబ్లీలోనే అడిగారన్న బొత్స.. ఈ విషయమై రాష్ట్రవ్యాప్తంగా చర్చ జరుగుతోందన్నారు. రాజకీయ లబ్ధి కోసం టీడీపీ శాసన మండలి నిబంధనలను తుంగలోకి తొక్కిందని బొత్స ఆరోపించారు. మండలి చైర్మన్ టీడీపీ కార్యకర్తలా వ్యవహరిస్తున్నారన్న మంత్రి.. శాసన మండలి లేకున్నా తమకు వచ్చే నష్టం లేదన్నారు.

ఎమ్మెల్సీలను ప్రలోభ పెడుతున్నట్టు టీడీపీ తప్పుడు ఆరోపణలు చేస్తోందన్న బొత్స.. మండలి రద్దయితే లోకేశ్‌కు పదవి పోతుందని బాబుకు భయం పట్టుకుందన్నారు. లోకేశ్ ప్రత్యక్ష ఎన్నికల్లో గెలవలేడని ఎద్దేవా చేశారు. గతంలో టీడీపీనే తమ ఎమ్మెల్యేలను లాగేసుకుందన్నారు.

శాసన మండలిలో జరుగుతున్న పరిణామాలను టీడీపీకి వంతపాడే ‘ఈనాడు’ సమర్థిస్తోందా? అని రామోజీ రావును బొత్స ప్రశ్నించారు. 1983లో టీడీపీకి బలం లేనప్పుడు ఎలా వ్యవహరించారో ఆయన గుర్తు చేశారు. ఇప్పుడు టీడీపీకి మెజార్టీ ఉందని రద్దుకు వ్యతిరేకిస్తున్నారని మంత్రి ఆరోపించారు.