ఆయన ఏం మాట్లాడారని అడిగా.. పుస్తకం తెచ్చిచ్చారు.. బాబుపై ఏపీ మంత్రి సెటైర్లు

చంద్రబాబు పత్రికా స్వేచ్ఛ గురించి మాట్లాడడం హాస్యాస్పదమని ఏపీ మంత్రి బొత్స సత్యనారాయణ అన్నారు. చంద్రబాబు మాటలు దెయ్యాలు వేదాలు వల్లించినట్లుందని ఎద్దేవా చేశారు. టీడీపీ హయాంలో సాక్షి పత్రికపై కేసుల గురించి బొత్స ప్రస్తావించారు. వాటికేం సమాధానం చెబుతారని ప్రశ్నించారు. ఏదో జరిగిపోయినట్లు బాబు గగ్గోలు పెడుతున్నారని విమర్శించారు. కొత్త చట్టాలు, చట్ట సవరణలు చేయలేదని.. ఇప్పటికే ఉన్న చట్టాన్ని పటిష్టంగా అమలు చేస్తామన్నారు.

చంద్రబాబు ప్రెస్‌మీట్‌పై బొత్స ఆసక్తికర వ్యాఖ్యలు చేశారు. ‘చంద్రబాబు ఏం మాట్లాడారని అడిగితే పీఏ ఒక పుస్తకం తెచ్చి ఇచ్చాడు. పాపం ఎంతసేపు మాట్లాడాడో.. ఆ చానళ్లు ఎంతసేపు లైవ్ ఇచ్చారో’ అంటూ సెటైర్లు వేశారు. సూటిగా, సుత్తి లేకుండా సబ్జెక్ట్పై మాట్లాడాలని హితవు పలికారు. చెత్తాచెదారం పక్కనబెట్టి సాక్షిపై పెట్టిన కేసులకు సమాధానం చెప్పాలని సూటిగా ప్రశ్నించారు. ప్రభుత్వ గౌరవానికి భంగం కలిగేలా ఇష్టారాజ్యంగా వార్తలు రాయొచ్చని ఏ న్యాయస్థానం చెప్పిందంటూ నిలదీశారు.

Also Read: మీ బాక్సైట్ బాగోతమిదేగా.! జగన్‌ సర్కార్‌పై జనసేన ఘాటు విమర్శలు

జగన్ ముఖ్యమంత్రి కావడాన్ని చంద్రబాబు జీర్ణించుకోలేకపోతున్నారని బొత్స విమర్శించారు. వైఎస్సార్సీపీ అధికారంలోకి వచ్చి నాలుగు నెలలే అయిందన్నారు. ఈ నాలుగు నెలలకే ఎందుకింత ఆవేశమని ప్రశ్నించారు. చంద్రబాబు ఎన్ని ముసలికన్నీరు కార్చినా, డ్రామాలేసినా ప్రజలు నమ్మరని బొత్స అన్నారు. బాబు సహజ తత్వం జనాలకు తెలిసిపోయిందన్నారు. ఇంకా అధికారంలోనే ఉన్నామని భ్రమలో చంద్రబాబు ఉన్నారని బొత్స ఎద్దేవా చేశారు.

సీఎంగా ఆయన చూపిన అహంభావం, గర్వంలో వీసమెత్తు కూడా తాము చూపడం లేదన్నారు. తాము కూడా ఆయలాగే ప్రవర్తిస్తే అసలు బయట తిరగలేరన్నారు. ప్రభుత్వ దుబారా తగ్గించేందుకే రెండు పత్రికలకు మాత్రమే ప్రభుత్వ ప్రకటనలు ఇచ్చినట్లు భావిస్తున్నానన్నారు. ఎక్కువ సర్క్యులేషన్ ఉన్న పత్రికలకే ప్రకటనలు ఇచ్చి ఉంటారన్నారు. చిన్నపత్రికల మనుగడకు భంగం వాటిల్లే ప్రమాదం ఉంటే ప్రకటనల విషయమై ప్రభుత్వం తప్పకుండా ఆలోచన చేస్తుందన్నారు.