పవన్ కళ్యాణ్ 175 నియోజకవర్గాల పేర్లు చెప్పగలరా? చెప్తే దేనికైనా రెడీ: ఏపీ మంత్రి

జనసేన పార్టీ అధినేత పవన్ కళ్యాణ్‌ను రాష్ట్ర ఐటీ, పరిశ్రమల శాఖ మంత్రి గుడివాడ అమర్నాథ్ మరోసారి టార్గెట్ చేశారు. రాష్ట్రంలోని 175 నియోజకవర్గాల పేర్లు పవన్ కళ్యాణ్ చెప్పగలిగితే తాను అన్నీ వదులుకుని ఎక్కడికైనా వెళ్లిపోయేందుకు సిద్ధంగా ఉన్నానని సవాల్ విసిరారు. వైఎస్ జగన్మోహన్ రెడ్డి ఎప్పటికీ ముఖ్యమంత్రి కాలేరని 2019 ఎన్నికల ముందు చెప్పారని.. కానీ ఏమైందో అందరూ చూశారని ఎద్దేవా చేశారు. ఇప్పుడు కూడా వచ్చే ఎన్నికల్లో వైసీపీ గెలవదని చెప్తున్నాడని.. మళ్లీ వైసీపీ గెలిచి తీరుతుందని మంత్రి గుడివాడ అమర్నాథ్ జోస్యం చెప్పారు.

ఇకపోతే, వచ్చే ఎన్నికల్లో ఎన్ని స్థానాల్లో పోటీ చేస్తారో పవన్ కళ్యాణ్ చెప్పగలరా అని మంత్రి అమర్నాథ్ ప్రశ్నించారు. కనీసం ఏ నియోజకవర్గం నుంచి పోటీ చేస్తారో చెప్పగలరా అని నిలదీశారు. మరోవైపు అమరావతి రాజధాని అన్నది ఓ స్కామ్ అని మంత్రి అమర్నాథ్ ఆరోపించారు. అమరావతి రైతులు ఇప్పటికైనా వాస్తవాలు తెలుసుకోవాలన్నారు. తెలుగు దేశం పార్టీ వాళ్లు అమరావతి రైతులను బెదిరించి భూములను లాక్కున్నారని ఆరోపించారు.

మూడు ప్రాంతాలు అభివృద్ధి చెందాలన్న సీఎం జగన్ ఆకాంక్షను ఎవరూ అడ్డుకోలేరని.. ఈరోజు సుప్రీం కోర్టు కూడా ఇదే అభిప్రాయాన్ని వ్యక్తం చేసిందని మంత్రి అమర్నాథ్ సంతోషం వ్యక్తం చేశారు. అమరావతి ప్రాంతం నుంచి విజయవాడకు వెళ్లాలన్నా 40 కిలో మీటర్లు, గుంటూరు వెళ్లాలన్నా 40 కిలో మీటర్లు, ఎయిర్‌పోర్టుకు వెళ్లాలంటే 50 కి.మీ వెళ్లాలని.. ఇది ఆమోదయోగ్యం కాదన్నారు. అలాగని అమరావతి అభివృద్ధికి తాము వ్యతిరేకం కాదని స్పష్టం చేశారు.