పవన్ కళ్యాణ్‌కు ఎప్పుడు స్వాతంత్య్రం వస్తుందో చెప్పాలి.. మంత్రి అమర్నాథ్ సెటైర్లు

జనసేన పార్టీ అధినేత పవన్ కళ్యాణ్‌పై రాష్ట్ర పరిశ్రమలు, ఐటీ శాఖ మంత్రి గుడివాడ అమర్నాథ్ మరోసారి తీవ్ర స్థాయిలో విరుచుకుపడ్డారు. ఈ మేరకు సోమవారం మంత్రి గుడివాడ అమర్నాథ్ మీడియాతో మాట్లాడుతూ.. సొంతంగా ఎన్నికల్లో పోటీ చేయడానికి జనసేన పార్టీకి, పవన్ కళ్యాణ్‌కు ఎప్పుడు స్వాతంత్య్రం వస్తుందో చెప్పాలని సెటైర్లు వేశారు. రాష్ట్రంలోని 175 అసెంబ్లీ స్థానాలు, 25 పార్లమెంటు స్థానాల్లో పోటీ చేసే స్వాతంత్య్రం నీకు ఉందా అని ప్రశ్నించారు.

2024 ఎన్నికల్లో 175 ఎమ్మెల్యే, 25 ఎంపీ స్థానాల్లో జనసేన పార్టీ పోటీ చేస్తుందో.. లేదో పవన్ కళ్యాణ్ ముందుగా సమాధానం చెప్పాలని మంత్రి గుడివాడ అమర్నాథ్ డిమాండ్ చేశారు. దేశమంతా స్వాతంత్య్ర వేడుకలు జరుపుకుంటున్న తరుణంలో పవన్ కళ్యాణ్ రాజకీయ కామెంట్లు చేయడం సిగ్గుచేటన్నారు.

ఒంటరిగా పోటీ చేసే స్వతంత్రం లేని నువ్వు స్వాతంత్య్రం గురించి మాట్లాడటం సిగ్గుచేటని మంత్రి అమర్నాథ్ చెప్పారు. అసలు తెలుగుదేశం పార్టీ నుంచి జనసేన పార్టీకి స్వతంత్య్రం వచ్చిందా.. అని పవన్ కళ్యాణ్‌ను సూటిగా ప్రశ్నిస్తున్నట్లు పేర్కొన్నారు. 76వ స్వాతంత్య్ర దినోత్సవ వేడుకల్లో.. తెలుగుదేశం పార్టీ నుంచి స్వతంత్ర్యం కోసం జనసైనికులు ఎదురు చూస్తున్నారని చెప్పుకొచ్చారు. తెలుగు దేశం పార్టీ అధినేత చంద్రబాబునాయుడుకు మేలు చేయడానికే పవన్ కళ్యాణ్ ప్రయత్నిస్తున్నాడు తప్ప.. ఆయన, జనసేన పార్టీ వల్ల రాష్ట్రానికి ఎలాంటి మేలు లేదని స్పష్టం చేశారు.