ఏపీలో ఎస్సీలకు గుడ్ న్యూస్.. ఈ పథకాల కోసం దరఖాస్తు చేసుకోండి: మంత్రి నాగార్జున

ఆంధ్రప్రదేశ్ రాష్ట్రంలో షెడ్యూల్ కులాల (ఎస్సీ) కార్పొరేషన్ ద్వారా అమలు చేయనున్న అమృత్ జలధార, యంగ్ ఎంటర్ ప్రెన్యూర్ పథకాలలో లబ్ధి కోసం అర్హులైన లబ్ధిదారులు దరఖాస్తులు చేసుకోవాలని రాష్ట్ర సాంఘిక, సంక్షేమ శాఖ మంత్రి మేరుగు నాగార్జున సూచించారు. ఈ మేరకు బుధవారం మంత్రి నాగార్జున ఓ ప్రకటన చేశారు.

కేంద్ర ప్రభుత్వం అమలు చేస్తున్న అమృత్ జలధార పథకం కింద ఎస్సీ రైతుల భూములకు నీటి వసతిని కల్పించేందుకు బ్యాంకులు, ఇతర సంస్థల ద్వారా ఇప్పటికే రుణాలు మంజూరైన రైతులకు బోరు బావులు, స్పింక్లర్లు, డ్రిప్ ఇరిగేషన్ ఏర్పాటు చేసుకోవడానికి రూ. 50 వేలు సబ్సిడీగా ఇవ్వనున్నట్లు తెలిపారు. రెండున్నర ఎకరాల భూమి, రూ. 3 లక్షలకు లోపు వార్షిక ఆదాయం కలిగిన ఎస్సీ రైతులు అమృత్ జలధార పథకంలో లబ్ధి పొందేందుకు అర్హులని మంత్రి మేరుగు నాగార్జున తెలిపారు.

అలాగే, యంగ్ ఎంటర్‌ప్రెన్యూర్ పథకంలో భాగంగా ట్రాక్టర్లు, ట్రాలీలు, కమర్షియల్ వాహనాలు, వేర్ హౌసెస్ తదితర స్వయం ఉపాధి పథకాలకు ఇప్పటికే బ్యాంకులు, ఇతర సంస్థల ద్వారా రుణాలు మంజూరైన ఎస్సీ యువతకు రూ. 60 వేలు సబ్సిడీగా ఇవ్వనున్నట్లు మంత్రి మేరుగు నాగార్జున వెల్లడించారు. అమృత్ జలధార పథకం కోసమైతే పట్టాదారు పాసు పుస్తకాలు, రవాణాకు సంబంధించిన యంగ్ ఎంటర్‌ప్రెన్యూర్ పథకం కోసమైతే వ్యాలీడ్ డ్రైవింగ్ లైసెన్స్‌తో పాటుగా ఆదాయ, కుల, విద్యా ధృవీకరణ పత్రాలు, రేషన్ కార్డు, ఆధార్, బ్యాంక్ పాస్‌పుస్తకాల నకళ్లతో దరఖాస్తులు చేసుకోవాలని నాగార్జున వివరించారు. అర్హులైన వారు తమ దరఖాస్తులను ఆయా జిల్లాలకు చెందిన ఎస్సీ కార్పొరేషన్ ఈడీలకు తమ దరఖాస్తులను సమర్పించాలని కోరారు. ఈ పథకాల మంజూరులో పరిమితి లేదని అర్హులైన వారందరికీ వీటిని మంజూరు చేస్తామని మంత్రి వెల్లడించారు.