పవన్ కళ్యాణ్‌ జోకర్‌, నాగబాబు మనిషిగా ఎదిగారు గానీ.. మంత్రి రోజా తీవ్ర వ్యాఖ్యలు

జనసేన పార్టీ అధినేత పవన్ కళ్యాణ్‌పై మంత్రి ఆర్కే రోజా సెల్వమణి మరోసారి తీవ్ర వ్యాఖ్యలు చేశారు. పవన్ కళ్యాణ్ కేవలం సినిమాల్లో మాత్రమే గబ్బర్ సింగ్ అని.. రాజకీయాల్లో మాత్రం రబ్బర్ సింగ్ అని ఎద్దేవా చేశారు. తాను రెండు సార్లు ఎమ్మెల్యేగా మంత్రినయ్యానని.. రెండు చోట్ల ఓడిపోయిన పవన్‌ని చూసి ఎవరూ భయపడరని తేల్చి చెప్పారు. పవన్ కళ్యాణ్ ఎప్పటికీ రాజకీయ నాయకుడు కాలేరని అభిప్రాయపడ్డారు.

పవన్ కళ్యాణ్ తనను డైమండ్ రాణి అంటున్నారని.. తాను నిజంగానే రాణినే అని మంత్రి రోజా పేర్కొన్నారు. సినిమాల్లో నటిగా, ఇంట్లో ఇల్లాలిగానే కాకుండా రాజకీయాల్లోనూ తనని తాను నిరూపించుకొని రాణిలా ఉన్నానని చెప్పారు. తన గురించి పవన్ కళ్యాణ్ మరోసారి ఇష్టమొచ్చినట్లు మాట్లాడితే బాగుందని వార్నింగ్ ఇచ్చారు.

ఇక, తెలుగు దేశం పార్టీ అధినేత చంద్రబాబునాయుడు సైకోకు పరాకాష్టగా మారారని, జనం రాకపోవడంతో రోడ్లపై సభలు పెడుతున్నారని మంత్రి రోజా నిప్పులు చెరిగారు. చంద్రబాబు, పవన్‌లకు పదువులే ముఖ్యమని.. ప్రజల సమస్యల్ని పట్టించుకోరని మండిపడ్డారు. ఇక తనకు, మెగాస్టార్ చిరంజీవికి మధ్య ఎలాంటి గొడవలు లేవని క్లారిటీ ఇచ్చారు. చిరంజీవి రాజకీయాలకు పనికి రారని ఆనాడే చెప్పానని.. ఇప్పుడు కూడా అదే చెప్తున్నానని వ్యాఖ్యానించారు. చిరంజీవి సున్నితమైన వ్యక్తి అని.. ఆ విషయమే ఇప్పుడు నిజమని తేలిందన్నారు.

అయితే, చిరంజీవి తమ్ముళ్లు పవన్‌ కళ్యాణ్, నాగబాబు మాత్రం మహిళలపై కూడా ఇష్టమొచ్చినట్లు మాట్లాడుతున్నారని మంత్రి రోజా ఫైరయ్యారు. పవన్ కళ్యాణ్‌ను జోకర్‌గా అభివర్ణించిన రోజా.. నాగబాబుపై కూడా పంచ్‌లు వేశారు. నాగబాబు మనిషిగా ఎదిగారు గానీ, మైండ్ పెరగలేదని ఎద్దేవా చేశారు. పవన్‌కి, నాగబాబుకి మేల్ ఈగో ఎక్కువగా ఉందన్నారు. ఆ ఇద్దరికి రాసిచ్చిన స్క్రిప్టులు చదవడం తప్ప ఇంకేం తెలియదని సెటైర్లు వేశారు. కనీసం ఒక్క చోట కూడా గెలవని ఆ ఇద్దరు తనపై వ్యాఖ్యలు చేయడం చిల్లరగా ఉందన్నారు. తాను కళాకారులతో డ్యాన్స్ చేస్తే, వారు ట్రోల్ చేస్తున్నారని.. వారు మాత్రం కూతురు వయస్సున్న అమ్మాయిలతో డ్యాన్స్ చేయడం కరెక్టేనా అని ప్రశ్నించారు.