బాబాయ్‌ అచ్చెన్నపై అబ్బాయ్ రామ్మోహన్ ఎమోషనల్ పోస్ట్

ఏపీ టీడీపీ అధ్యక్షుడిగా సీనియర్ నేత కింజారపు అచ్చెన్నాయుడికి చంద్రబాబు బాధ్యతలు అప్పగించారు. అలాగే పార్టీ కమిటీలను ప్రకటించారు.. సీనియర్లు, జూనియర్లకు ప్రాధాన్యం ఇచ్చారు. కొత్త అధ్యక్షుడు అచ్చెన్నకు నేతలు, తెలుగు తమ్ముళ్లు అభినందనలు తెలుపుతున్నారు. బాబాయ్‌ అచ్చెన్నకు అధ్యక్ష పదవి ఇవ్వడంపై అబ్బాయ్ టీడీపీ ఎంపీ రామ్మోహన్ నాయుడు స్పందించారు.. ఎమోషనల్ ట్వీట్ చేశారు.

‘తెలుగుదేశం రాష్ట్ర అధ్యక్షునిగా నియమించబడిన అచ్చెన్నాయుడు గారికి హృదయపూర్వక శుభాకాంక్షలు. చిన్నప్పటి నుంచి బాబాయ్ స్థైర్యం, ఎవరికీ భయపడని గుండెబలం, అందరినీ కలుపుకుపోయే మనస్తత్వం చూస్తూ పెరిగాను. పార్టీని ముందుకి తీసుకెళ్లే కృషిలో మేమందరం మీ వెనకుంటాం. జై తెలుగు దేశం జై హింద్!’ అంటూ ట్వీట్ చేశారు.
తనకు జాతీయ ప్రధాన కార్యదర్శి పదవి ఇచ్చినందుకు చంద్రబాబుకు కృతజ్ఞతలు తెలిపారు. ‘నా పని తీరు మీద నమ్మకముంచి టీడీపీ జాతీయ కార్యదర్శిగా మళ్ళీ నియమించిన పార్టీ నాయకత్వానికి కృతజ్ఞతలు. ఓటములు అడ్డంకులు ఎన్ని ఎదురైనా ఎదురొడ్డి నిలిచిన చరిత్ర తెలుగు దేశానిది. నా రాజకీయ ప్రస్థానానికి తోడ్పడిన కుటుంబం, పార్టీ కార్యకర్తలు, శ్రీకాకుళం జనానికి నేనెప్పుడూ రుణపడి ఉంటాను’ అని రామ్మోహన్ మరో ట్వీట్ చేశారు.