రిటైర్డ్ ఐఏఎస్‌ రత్నప్రభ ఎస్సీ కాదని పిటిషన్‌.. విచారణకు ఆదేశాలు

రిటైర్డ్ ఐఏఎస్‌ అధికారిణి, భారతీయ జనతా పార్టీ నాయకురాలు రత్నప్రభ ఎస్సీ కాదంటూ కోర్టులో పిటిషన్‌ దాఖలైంది. దీంతో ఈ వ్యవహారంపై దర్యాప్తు జరపాలని నాంపల్లి మూడో మెట్రో పాలిటిన్‌ కోర్టు పోలీసులను ఆదేశించింది. ఏవీ రమణ అనే వ్యక్తి ఈ పిటిషన్‌ను దాఖలు చేశారు. ఐఏఎస్ అధికారిగా రత్నప్రభ ఉన్న సమయంలో ఆమె ఫిర్యాదు మేరకు 2012లో రమణపై ఎస్సీ, ఎస్టీ అట్రాసిటీ కేసు నమోదైంది. దాంతో సీసీఎస్‌ అధికారులు రమణను అరెస్టు చేశారు.

అయితే తనపై తప్పుడు కేసు పెట్టారని, రత్నప్రభ అసలు ఎస్సీనే కాదంటూ రమణ కోర్టును ఆశ్రయించారు. అప్పటి షేక్‌పేట మండల తహసీల్దార్‌ చంద్రకళ ద్వారా ఎస్సీ సర్టిఫికెట్‌ తీసుకుని తనపై అక్రమంగా కేసు నమోదు చేశారని ఆరోపించారు. ఈ వ్యవహారంలో అప్పటి పోలీస్‌ కమిషనర్‌ ఏకే ఖాన్‌పై కూడా కేసు నమోదు చేయాలని కోరారు. దీంతో ఈ పిటిషన్‌ను స్వీకరించిన కోర్టు.. అన్ని విషయాలపై విచారణ జరిపి నివేదిక సమర్పించాలని బంజారాహిల్స్‌ పోలీసులను ఆదేశించింది.

కాగా, కర్ణాటక కేడర్‌కు చెందిన రత్నప్రభ.. ఆ రాష్ట్రానికి ప్రభుత్వ ప్రధాన కార్యదర్శిగా కూడా పని చేశారు. రిటైర్మెంట్ తర్వాత భారతీయ జనతా పార్టీ తరఫున రాజకీయాల్లోకి ఎంట్రీ ఇచ్చారు. 2021లో జరగిన తిరుపతి లోక్‌సభ స్థానానికి జరిగిన ఉప ఎన్నికలో బీజేపీ అభ్యర్థిగా పోటీ చేశారు. ఈ ఎన్నికలో వైఎస్సార్ కాంగ్రెస్ పార్టీ అభ్యర్థి గురుమూర్తి చేతిలో రత్నప్రభ ఓటమిపాలయ్యారు. ఈ క్రమంలో రత్నప్రభ ఎస్సీ కాదంటూ కోర్టులో పిటిషన్ దాఖలు కావడం గమనార్హం.