విశాఖ ఏజెన్సీలో దారుణం.. రోడ్డు మీదే ప్రసవం, పసికందు మరణం

విశాఖ ఏజెన్సీలో గర్భిణీలను కష్టాలు వెంటాడుతున్నాయి. అంబులెన్స్ రావడానికి రహదారి మార్గం లేకపోవడంతో కిలోమీటర్ల మేర నడుచుకుని ఆసుపత్రులకు వెళ్లాల్సిన దుస్థితి నెలకొంది. పాడేరు మండలం వై.సంపల గ్రామానికి చెందిన జ్యోతి, కాసులమ్మ అనే ఇద్దరు నిండు గర్భిణులను బంధువులు శనివారం ఆసుపత్రికి తీసుకెళ్లాలని భావించారు. అంబులెన్స్ రావడానికి దారి సరిగా లేకపోవడంతో.. నడక ప్రారంభించారు. జ్యోతికి పురిటి నొప్పులు ఎక్కువ కావడంతో.. అడుగు తీసి అడుగు వేయలేని స్థితిలో ఆశా వర్కర్ ఆమెకు రోడ్డు పక్కనే డెలివరీ చేశారు. కానీ పురిటిలోనే బిడ్డ మరణించింది.

పసిగుడ్డును బతికించేందుకు ఆశా వర్కర్లు చేసిన ప్రయత్నాలు ఫలించలేదు. బాలింత ప్రసవ వేదనను బంధువులు,స్థానికులు వీడియో తీశారు. రోడ్డు మీద డెలివరీ కావడం వల్ల వైద్యం అందక బిడ్డ చనిపోవడం అందర్నీ కలచివేసింది. జ్యోతితోపాటు మరో గర్భిణిని హాస్పిటల్‌కు తరలించి చికిత్స అందిస్తున్నారు.

25 రోజుల క్రితం కూడా విశాఖ ఏజెన్సీలో ఇలాంటి ఘటన చోటు చేసుకుంది. విశాఖ జిల్లా పెదబయలు మండలం జమదంగికి చెందిన లక్ష్మీ అనే గర్భిణి వైద్యం కోసం 20 కి.మీ. నడిచి వెళ్లింది. జి.మాడుగుల మండంలోని బొయితిలో ఉన్న ఆర్ఎంపీ డాక్టర్ దగ్గర చికిత్స చేయించుకొని తిరుగు ప్రయాణమైన ఆమెకు మార్గమధ్యంలో పురిటి నొప్పులు వచ్చాయి. డోలీలో ఇంటికి తీసుకెళ్లగా.. ప్రసవం తర్వాత తీవ్ర రక్తస్రావమైంది. ఈ ఘటనలో తల్లీ, బిడ్డ ఇద్దరూ చనిపోయారు.