తూర్పులో గ్యాస్ పైప్ లీక్.. పరుగులు పెడుతున్న జనాలు

తూర్పు గోదావరి జిల్లా కాట్రేనికోన మండలం ఉప్పూడి వద్ద ఓఎన్‌జీసీ గ్యాస్‌ పైప్‌ లైన్‌ లీకైంది. పంట పొలాల మధ్య ఉన్న పైప్‌ లైన్ పగిలి.. భారీగా గ్యాస్ లీకవుతోంది. గ్యాస్ లీకేజీ గురించి తెలియడంతో స్థానికులు తీవ్ర భయాందోళనలకు గురవుతున్నారు. దీంతో అధికారులు వెంటనే అప్రమత్తమయ్యారు. చుట్టుపక్కల కిలో మీటర్ పరిధి వరకు గ్రామంలోని ఇళ్లను ఖాళీ చేయిస్తున్నారు. కాట్రోనికోన నుంచి మండల కేంద్రానికి వెళ్లే రహదారిని తాత్కాలికంగా మూసివేశారు. అనంతరం రాజమహేంద్రవరంలోని ఓఎన్జీసీ అధికారులకు సమాచారం అందజేశారు.

గ్యాస్ లీకైందన్న సమాచారం అందిన వెంటనే.. ఇళ్లకు అధికారులు విద్యుత్ సరఫరా నిలిపివేసినట్లు స్థానిక ప్రజలు చెబుతున్నారు. కనీసం గ్యాస్ స్టవ్స్ కూడా వెలిగించవద్దని, ఎలాంటి నిప్పు మండించవద్దని అధికారులు స్థానికులకు చెప్పారు. కాగా, గ్యాస్ పైప్ లైన్ నిర్వహణ బాధ్యతలను పీహెచ్ఎఫ్ అనే సంస్థ పర్యవేక్షిస్తోంది. నిర్వహణ పనులు జరుగుతుండగానే పైప్ లైన్ నుంచి లీకేజీ జరిగినట్లు తెలుస్తోంది. గ్యాస్ లీకేజీ సమాచారంతో అప్రమత్తమైన ఓఎన్జీసీ అధికారులు అవసరమైన పరికరాలతో ఘటనా స్థలానికి చేరుకున్నట్లు సమాచారం.
కాగా, శనివారమే సఖినేటిపల్లి అంతర్వేదిలోని సెయింట్‌ మేరీ స్కూల్లో కేవీ 12 బావి పైపులైన్‌ నుంచి గ్యాస్ లీకైంది. ఈ ఘటన మరవకముందే కాట్రోనికోనలో గ్యాస్ లీకవడం గమనార్హం. సెయింట్ మేరీస్ స్కూల్లోని కేవీ 12 బావి నుంచి పెద్ద శబ్దాలతో గ్యాస్ లీకవడంతో స్థానికులు భయాందోళనకు గురయ్యారు. అయితే ఓఎన్జీసీ అధికారులకు సమాచారం అందించడంతో.. హుటాహుటిన అక్కడికి చేరుకుని గ్యాస్‌ లీకేజ్‌ను అరికట్టారు. అయితే కేవీ 19, 3, 12 బావుల నుంచి తరుచూ గ్యాస్ లీకేజీ అవుతోందని స్థానికులు ఆరోపిస్తున్నారు. ఓఎన్జీసీ అధికారులు నిర్లక్ష్యంగా వ్యవహరిస్తుండటం ఆందోళనకు గురి చేస్తోందంటున్నారు.