YSRCP: పరిమళ్ నత్వానీ.. ఏపీలోకి ఎంట్రీతోనే జగన్‌కు ఇలా షాకిచ్చారేంటి..?

వైఎస్ఆర్సీపీ రాజ్యసభ సభ్యులను జగన్ ఖరారు చేసిన సంగతి తెలిసిందే. మంత్రి పదవులను కోల్పోనున్న మోపిదేవి వెంకట రమణ, పిల్లి సుభాష్ చంద్రబోస్‌లతోపాటు.. ఆళ్ల అయోధ్య రామిరెడ్డి పెద్దల సభకు వెళ్లనున్నారు. రిలయన్స్ అధినేత ముకేశ్ అంబానీ సన్నిహితుడైన పరిమళ్ నత్వానీకి కూడా జగన్ రాజ్యసభ టికెట్ ఇచ్చారు. నత్వానీకి రాజ్యసభ సభ్యత్వం ఇవ్వాలన్న అమిత్ షా సూచనల మేరకు జగన్ ఈ నిర్ణయం తీసుకున్నారని ప్రచారం జరగ్గా... దాన్ని బలపర్చేలా అమిత్ షా, ప్రధాని మోదీలను నత్వానీ తన ట్వీట్‌లో ట్యాగ్ చేశారు. ఏపీ నుంచి పెద్దల సభకు వెళ్తున్న నత్వానీ.. సోమవారం నుంచి రాష్ట్రంలోనే ఉన్నారు.

విజయవాడలో దుర్గమ్మను దర్శించుకున్న నత్వానీ.. తిరుమలేశుడిని కూడా దర్శించుకున్నారు. ఈ సందర్భంగా వైఎస్సార్సీపీ నేతలు ఆయన దర్శనం కోసం ఏర్పాట్లు చేశారు. నత్వానీ కనకదుర్గ దర్శనం చేసుకోవడానికి వెళ్లిన సమయంలో మచిలీపట్నం ఎంపీ బాలశౌరి ఆయన తోడు ఉండగా.. తిరుమల బాలాజీ దర్శనం కోసం చంద్రగిరి ఎమ్మెల్యే చెవిరెడ్డి భాస్కరరెడ్డి ఏర్పాట్లు చేశారు. ఈ విషయాలను ట్వీట్ చేసిన నత్వానీ.. అంతకు ముందు విజయవాడలోని ఓ హోటల్‌లో డిన్నర్ చేసిన విషయాన్ని కూడా ట్విట్టర్ ద్వారా వెల్లడించారు.
నత్వానీకి జగన్ రాజ్యసభ టికెట్ ఖరారు చేశారనే వార్త బయటకు రాగానే.. ఆయన సీఎం జగ‌న్‌కు, వైఎస్సార్సీపీకి ధన్యవాదాలు తెలుపుతూ ట్వీట్ చేశారు. ఏపీ ప్రజలకు సేవ చేయడానికి తాను కట్టుబడి ఉన్నానన్నారు. ఇదే ట్వీట్‌లో ఆయన పీఎంవో, ప్రధాని మోదీ, అమిత్ షాను ట్యాగ్ చేశారు. నత్వానీ చేసిన ట్వీట్ పట్ల నెటిజన్లు రకరకాలుగా స్పందించారు. కొందరు ఏపీకి పరిశ్రమలు తీసుకురావాలని కోరితే.. మరికొందరు విమర్శలు గుప్పించారు. తన ట్వీట్‌కు వచ్చిన దాదాపు అన్ని రిప్లయ్‌లకు నత్వానీ లైక్ కొట్టారు. ఇందులో జగన్‌ను, బీజేపీతోపాటు నత్వానీని విమర్శిస్తూ.. ఇంగ్లిష్‌లో చేసిన ట్వీట్లు కూడా ఉండటం గమనార్హం.
నత్వానీ తమ ట్వీట్లకు లైక్ కొట్టడాన్ని చాలా మంది నమ్మలేకపోతున్నారు. విమర్శిస్తూ చేసిన ట్వీట్లకు కూడా లైక్ కొట్టడం ఏంటనే భావనలో ఉన్న కొందరు.. వాటిని స్క్రీన్ షాట్లు తీసి షేర్ చేస్తున్నారు. బహుశా ఆయన ట్విట్టర్ హ్యాండిల్‌ బాధ్యతలను చూస్తున్న వారి అశ్రద్ధ వల్ల ఇలా జరిగి ఉంటుందని భావిస్తున్నారు. కానీ ఆయన లైక్ చేసిన ట్వీట్లు వైఎస్సార్సీపీకి ఇబ్బందికరంగా మారాయి.