ఏపీలో అమానుషం.. కరోనా అనుమానంతో చెత్తబండిలో ఆస్పత్రికి

దేశ వ్యాప్తంగా కరోనా విజృంభణ కొనసాగుతోంది. ఆంధ్రప్రదేశ్‌లో కరోనా కేసుల సంఖ్య రోజురోజుకు మరింత పెరుగుతోంది. అయితే కరోనా పాజిటివ్ వస్తేనేకాదు... ఎవరిలో అయినా ఏ మాత్రం కరోనా లక్షణాలు ఉన్నా జనం భయాందోళనలు వ్యక్తం చేస్తున్నారు. వారిని ఏ మాత్రం దరిచేరనివ్వడం లేదు. ఇక కరోనాతో ఎవరైనా చనిపోతే వారి పట్ల కూడా అమానుషంగా ప్రవర్తిస్తున్నారు. తాజాగా కరోనా లక్షణాలు కలిగిన ఓ వ్యక్తిని ఆస్పత్రికి తీసుకెళ్లేందుకు కూడా భయపడతున్నారు. అందుకే అలాంటి లక్షణాలు ఉన్న ఓ వ్యక్తిని చెత్తబండిలో ఆస్పత్రికి తీసుకెళ్లిన అమానుష ఘటన చోటు చేసుకుంది.

పశ్చిమ గోదావరి ఆకివీడు మండలం భీమవరం గ్రామంలో దారుణం చోటుచేసుకుంది. ఆ ఊరి బస్టాప్ లో రెండు రోజుల నుంచి అనారోగ్యంతో ఓ వ్యక్తి భాధపడుతున్నాడు. అయితే కరోనా వైరస్ భయంతో ఎవరూ అతని దగ్గరికి కూడా వెళ్ళలేదు. 108 కు ఎన్నిసార్లు ఫోన్ చేసినా అంబులెన్స్ రాకపోవడంతో ప్రైవేట్ అంబులెన్సులకు కూడా ఫోన్ చేసారు. కానీ వారు కుడా స్పందించలేదు. ఇక చివరికి చెత్త బండిలో ఆకివీడు ప్రభుత్వాసుపత్రికి ఆ వ్యక్తిని తరలించారు.
Read More: అచ్చెన్నాయుడు బెయిల్ పిటిషన్‌పై తీర్పు రిజర్వ్
రెండు రోజులుగా అనారోగ్యంతో బాధపడుతున్నా.. అతనికి అయినవారు ఎవరూ లేరు. అయితే కరోనా భయంతో ఆ వ్యక్తివద్దకు ఎవరూ వెళ్లలేదు. చివరికి అతని ధీన స్థితిని చూడలేక కొందరు 108కు ఫోన్ చేశారు. ఎన్నిసార్లు చేసినా ఫలితం లేదు. దీంతో చెత్త ఆటోలో ఆకవీడు ప్రభుత్వ ఆస్పత్రికి పంపించారు. ఆ తర్వాత మెరుగైన వైద్యం కోసం బాధితుడిని ఏలూరుకు తరలించారు. ఇప్పటికే కరోనా భయంతో జనం ఎవరికి ఎలాంటి సాయం చేయడం లేదు. సాధారణ అనారోగ్యం వచ్చిన కూడా అలాంటి వారి దరిదాపుల్లోకి కూడా వెళ్లడం లేదు.