రాజధాని పేరుతో రూ.30వేల కోట్లు దుబారా.. జగన్ సర్కార్‌కు పీటర్ కమిటీ నివేదిక

రాజధాని అమరావతి పేరుతో రూ.30వేల కోట్లు దుబారా జరిగిందంటోంది పీటర్ కమిటీ. రాజధానిపై ప్రభుత్వానికి సమర్పించిన నివేదికలో పలు కీలక అంశాలను ప్రస్తావించినట్లు తెలుస్తోంది. ఈ నివేదికలో రాజధానిలోని ప్రతి ప్రాజెక్ట్, నిర్మాణాలను పున: సమీక్షించాలని పేర్కొన్నట్లు సమాచారం. అవసరానికి మించి ఖర్చు చేశారని.. నిర్మాణాలు కూడా నిబంధనలకు విరుద్ధంగా ఉన్నాయని తేల్చిందట. 75శాతానికి పైగా పూర్తైన టవర్లు, భవనాలను ఏం చేయాలన్నది ప్రభుత్వానికే వదిలేసిందట. రెండు నెలల పాటూ వివిధ అంశాలపై అధ్యయనం, పరిశీలన చేసిన కమిటీ ఈ నివేదికను సమర్పించింది.

రోడ్లతో పాటూ వివిధ భవనాలు, టవర్ల నిర్మాణ విషయంలో అవకతవకలు జరిగినట్లు కమిటీ తేల్చిందట. 50 శాతానిపైగా పూర్తయిన క్వార్టర్ల వంటి నిర్మాణాలను పూర్తి చేసి మిగిలిన అన్ని పనులు, ప్రాజెక్టులను సమీక్ష చేయాలని కమిటీ సిఫారసు చేసే అవకాశం ఉందట. దశల వారీగా చేపట్టాల్సిన పనులను గుర్తించి, వాటి వాస్తవిక అంచనాల ఆధారంగా రివర్స్‌ టెండరింగ్‌కు వెళ్లాలని నివేదికలో సూచించినట్లు తెలుస్తోంది.

అమరావతిలో టీడీపీ హయాంలో జరిగిన అవకతవకలు, చేపట్టాల్సిన చర్యలపై ప్రభుత్వం కమిటీని నియమించింది. వివిధ రంగాల్లో అనుభజ్ఞ‌ువలైన ఎఫ్‌సీఎస్‌ పీటర్, పొన్నాడ సూర్యప్రకాష్, అబ్దుల్‌ బషీర్, ఎల్‌.నారాయణరెడ్డి, ఐఎస్‌ఎన్‌ రాజు, ఆదిశేషు సభ్యులుగా ఉన్నారు. ఈ కమిటీ సమగ్ర వివరాలను సేకరించి విశ్లేషించింది. గత ప్రభుత్వం చేపట్టిన నిర్మాణాలు, భూ సమీకరణ పేరుతో సేకరించిన భూములను పరిశీలించింది.

ఇటు రాజధాని, రాష్ట్ర సమగ్రాభివృద్ధిపై రాష్ట్ర ప్రభుత్వం నియమించిన జీఎన్ రావు నేతృత్వంలో కమిటీ కూడా తొలిసారి సమావేశమయ్యింది. రాష్ట్రవ్యాప్తంగా పర్యటించిన అన్ని వర్గాల ప్రజల అభిప్రాయాలను స్వీకరించనుంది. ఈ కమిటీలో కూడా వివిధ రంగాలకు చెందిన నిపుణులు ఉన్నారు. ఈ కమిటీ కూడా ప్రభుత్వానికి ఆరు వారాల్లో నివేదిక సమర్పించనుంది.